حب من نوع آخر - الجزء الأول
أحبج حب غير عن حب الناس
أحبج وأعشق التراب إلي تحت أقدامج
أحبج من زمان ومن زمان و من زمان
أحب عيونج .. أحب شعرج ... أحب سمارج .. أحب عطرج
أحب كل الذكريات إلي تجمعنا مع بعض
تذكرين حبيبتي ... تذكرين أول نسمة هوا شميتها من هواج
تذكرين أول لحظة لقاء ..أول نظرة
تذكرين أول كلمة علمتينياها ياللي كلامج كله ذهب بذهب
تذكرين أول لقمة أكلتها بحضنج
تذكرين قطرة الماي .. إلي شربتها من ماي عينج ... يا عسى عيني ما تبجيج
فداج قلبي إلي حبج
تذكرين السوالف .. تذكرين السهر
تذكرين أيام البرد .. تمسحين على راسي بإيدج الدافية .. وأغفى وأنام على حزاويج
تذكرين أيام الصيف ...نجمع الكنار تحت السدرة .. وبصوتج العذب تقولين يكفي .. خلاص الشمس حارة أخاف النوم يعافك باليل
ويش أسوي إن لقيت محبوبي محموم ... وكيف أداري دمعي ولهفتي
يالله يا محبوب هذا طريج دارك يالله استريح
أنظر بعيوني لمعاني وجهك الحنون وأقول ... حاضر
وقلبي يتقطع يوم شفتج خايفة وتحاتين .. ألف خنجر بجسمي ولا أشوف دمعة بعينج
أكيد تذكريني وآنا أشيل الجنطة على ظهري الصغير وأمشي على تراب من ذهب .. أدري فيج إنتي من بعيييد تراقبيني وبقلبج تدعيلي
تذكرين يوم كنت أركض عالبحر وأجمع القواقع وكنت أسمع فيها همسج
يا فرحتي ويا هنا عيني يوم ملقاج بوقت الغروب .. تلاقيني بحضنج الدافي وقلبج الحنون
تذكرين العيد .. يا أحلى ما رأت عيني .. زاهية بثوبج .. وعذبة بكلامج
تذكرين يوم قلتلج .. ترى الناس غدارة .. قلتيلي ولا يهمك دامي معاك لا تشيل هم
تذكرين يوم قلتلج .. ترى الجذابين وايد .. وآنا ما أقدر عليهم .. قلتيلي ولا تهتم فيهم
تذكرين يوم قلتلج باعتزل الناس وبأحبس نفسي .. قلتيلي .. تعال بحضني ولا يهمك
إن دمعت عيني تتلقفيني من كل صوب .. وتمسحين دمعي بثوبج وتقولين النسيان نعمة للإنسان
دار الزمان والزمان دار وإنتي بعيوني أحلى وأغلى دانة
كبرت ..وبعدج على عهدج وآنا ما نسيتج .. يا عساني الموت إن نسيتج
ربيتيني وكبرتيني إنتي أمي وأبوي وكل الحبايب... يا كل ناسي وأحلى شئ بدنيتي
أحبج يا كويت وأمووووووووت وأحيا بأنفاسج
أحبج يا كويت
0 comments:
Post a Comment