يا حلات العزايم
تونس .. فيها تغيير جو .. وتواصل
وهذرة .. وسوالف
لكن الشي إلي مو شي فيها
التكرار
أصبحت محاور الحديث بأي عزيمة هي كالتالي
الريجيم
الزواج
الشغل
محفوظ مكانج يا أحاديث
كل الإجلال والتقدير لج
بس يا ربي مو فرض علينا نتكلم بهالثلاثة
الريجيم
حفظت كل وصفات الريجيم سواء من تجارب الغير واجتهاداتهم أو الوصفات إلي عن طريق الدكاترة إلي يراجعون عندهم
إنزين والضعيفة شتسوي بعمرها .. المسكينة تضيع بالسالفة
ستوب .. بلييييييز .. خنسوي بوز على هالنوع من الأحاديث
الزواج
المتزوجة تشكي من الريل وركضة العيال وحنة الشغالة
وإلي مومتزوجة تتكلم عن مواصفات زوج المستقبل
وعن الأحلام الوردية إلي بتلقاها في قفصها الذهبي
وفلان تزوج
وفلانة تطلقت
فلان عرس على زوجته
فلانة انفصلت عن ريلها وتزوجت مرة ثانية
وهلم جرا
آنا شخصيا .. أرفض بشدة الحديث بالخصوصيات الدقيقة للشخص
خبر حلو خطبة .. ملجة .. عرس .. طقطقة .. وناسة .. شي يفرح أوكي
بس اخبار تخص حياة الآخرين بتبعيات حياتهم الزوجية .. مرفوووووووووض عندي ومختوم عليه بالشمع الأحمر بعد
وألحين ياينا رمضان عساكم تعودونه انشالله .. تحلى سوالف الطبخات وفن الحلويات .. ياسلاااام والله موضوع شيق
الصراحة موضوع عجيب .. يكتسح الساحة بعنف
الشغل
ليش نطري إلي صار بالدوام .. بوقت اليمعة والتواصل
ليش لما نطق الكرت .. ما نسوي ديليت لفايل الشغل بالمخ
لو تحسبون نسب سوالفنا اليومية راح تلقون نسبة الحديث عن الدوام والأحداث إلي صارت فيه .. أعلى نسبة من بين نسب السوالف
القصد
أبي أحاديث يديدة
أبي مواضيع تلهلب .. مواضيع حماسية
يردون علي ويقولون لي هذا الواقع وهذا إلي نعيشه
أوكي آنا معاكم .. بس نبي نغير ... نبي شي يديد
نبي لحلحة
نبي حركة
يعني الحياة مافيها أشياء ثانية؟
ماكو اهتمامات أخرى؟
مافي أشياء يديدة؟
ماله داعي التكرار
وازين إلي ليه قعدت يمه .. ينشرح قلبك من سوالفه
وازين راعي الضحكة والنكتة
وازين إلي ما تنمل قعدته
وازين إلي بس تطالعه الكشرة شاقة ويهه من هالصوب ليهالصوب .. يااا حلو ملقاه .. الواحد ينسى تعبه
ماقول إلا وازينك زينااااااه
الضحك داء معدي
ضروري لانعاش اليوم والروتين
إذا عند الاخوان المصريين .. الدنيا لونها بمبي
آنا عندي .. الدنيا تبرق زري
أشيائي الغريبة
دايما يوم الثلاثا أداوم نايمة .. من أول ما أدش ليما أطلع .. أحس فيني النوم .. مادري ليش الواحد ينسطل يوم الثلاثاء سطالة مالها والي
في أحد عنده نفس هالشعور! عفية قولولي
صارلي جم اسبوع بس تحوشني ضيقة .. ورررررررررر .. إلى حبيبي إلي يبرد على قلبي
باسكن روبنز
من يوم ما غيرت لايت الأباجورة .. والأحلام ميح .. ماقمت أتحلم .. مافي أحلام كلش
انزين حلم واحد عن خاطري
أبد .. صفر
تهقون فيه علاقة؟
عندي رنة تليفون أخذتها من رفيجتي العزيزة كل شي غريب ألقاه عندها
بس أسمع هالرنة أموت من الضحك
الرنة تقول
يا يمة للة وللة .. ياسويداني
وخلونا نلعب سلة .. ياسويداني
وآآه ..آآه .. آآه .. للة يا سويداني
يحليلها فخرية البصري .. ودي أسألها .. شنو هدفج من ورا هالأغنية؟
يايتني عرة التصوير من قديم الزمان وإهي هوايتي المحببة والمفضلة عندي ومرتبطة بحبي للرسم والكتابة أحيان كثيرة تكون الصور ملهمتي .. فهالأيام صايرة أمشي وأصور
هالإغنية حبيبة قلبي أهديكم كلماتها مطلعها يقول
فدوتن لج عمري وكل إلي تبينه
عين خلج ما تشوف إلا إنتي زينة
لا يا زينة .. لا يا زينة .. الزعل جايد علينا
وسلامتكم
18 comments:
اول شي هي سوالف الحريم
والرياييل حدييثهم مايطلع عن الكرة
وسوالفها لووووووول
وباسكن روبنز شي جيد
ليش ماتعزميني ويااج
وبس
قومي نلعب سلة
اي والله صدقتي
ولا تقدين مع مدرسات
وييييييييييييييييييييييييع
بليز يعني مو كافي ان عمرنا نصه ضايع بالدوام
ليش تضيعون النص الثاني بالسوالف عن الدوام
ترى صج
السوالف ما تتغير كلش
نفس الاسطوانة
اخر اغنية عجيبة
فدوة لج
ذكرتينيي بوايد اشياء حلوة على هالاغنية
ماشالله عليج ماخليتي شاردة و لا واردة من امور الحياة الا و ذكرتيها
الله يحفظج و لا تحرمينا من سوالفج الشيقة
اللى يضحكنى ان الحريم يسولفون عن الريجيم واخم حاطين بيتزا
ومعجنات
وكيك جدامهم
وكل وحدة تسوى نفسها رشيقة واهيا تلوع الجبد
من صجى اتنرفز من يمعات الحريم
احس قرقة على الفاضى وماكو اى اضافة
انا من كثر قراءة و كتابة المدونات صاير مالي خلق اسولف بالصج كله ساكت
مساالخير والاحساس والطيبه مساء مايليق الا بالماسه
والله يالغالية
وتبين الصج كلشى بحياتنا صاير ممل
وروتين مابعده روتين
بالسوالف ،بالاكل ،حتي بمشاهدة التلفزيون هم في روتين
بس شنقول الحمدلله على كل حال
وربج يبدل حال من حال
دمت يالغاليه
:)))))))
واااااااازينج انتي زيناااااااه بسسسسس
اهي يت على السوالف بس
التكرار صار في كل شي
حتى الافلام و المسلسلات و الاغاني صارت مكررة
ما نستانس الا اذا سولفنا عن ذكريات الطفولة و الافلام القديمة و مسلسلات أول
بعد نسيتي الحين موسم السفر و السؤال المعتاد
ويييييييين بتسافرون هالسنة؟؟؟
و على طاري رمضان و الرجيم
يا لهوييييييييي
ذكرتيني
رمضان ما بقى عليه شي و أنا ليلحين ما ضعفت من رمضان اللي فات
ههههههههههههه
انزين شنسولف فيه بالله
مجلس الخمة و الاحداث السياسية؟
بالنسبة لأشيائج الغريبة
ما غريب الا الشيطان ياختي
أنا نفس شعورج هذا بالضبطططططط
بس فرق واحد فقط لا غير
انتي يوم الثلاثاء و أنا كل يوووووووووم
لووووووووووول
حلااااااته باسكن حبييييييب وقت الشدايد تلاقينه عند ويهج
و حلومج الله و الحلوووووم عاد
هههههههه
اي في علاقة نامي بالظلمه عشان يطلعلج الحلم سينمائي
هههههه
مشكووووووووره على الاهداء الروعه و انا بدوري أهديها لج
:*
الرجيم والزواج و الشغل
نفس مواظيع الرياييل بس ظيفي عليهم سوالف المجلس والحكومه
بس احنا نتناول هالمواظيع بصوره وختلفه
مثلا الرجيم:
لما انتكلم عنه نتكلم عن اشلون ان المره انتفخت بعد الولاده و صار لازم اتسوي رجيم و اشلون حريمنا عساهم ما قلو بطنين انتفخو
الزواج:
اتكلم عن التعدد والزواج من ثانه و افلان سواها و انتي ردي ما اتسويها
و ان المره قلت بطنين و انتفخت و صار لازم انتزوج عليها و لازم اتسوي رجيم
الدوام:
انتكلم عن البنات اللي معانا بالدوام و اشحلاتهم و اشلون الواحد فينا تزوج و قرد حاله و العن ابو العيله .. واشلون هالبنات امحافظين على اعمارهم
مو هاللي عندنا قلت بطنين و انتفخت لازم اتسوي رجيم و لازم انتزوج عليها
يعني انروح و انرد انعذرب بهالمره علما ان الواحد فينا لو لف العالم ما يلاقي وحده احسن ولا اجمل من مرته لوما الطفاقه
يمعة الأصدقاء ما تتعوض بالذهب
والسوالف اللي فيها
حتى لو كانت سخيفه
تظل لها صدى ما ينّسي
:)
خوش بوست
فيه تشويق
انا
مناف
بس مو مسوي
ساين إن
tresten
كله هالسوالف.. كله هالسوالف
مافي شي ثاني؟؟؟
الله باسكن يسرسح عالقلب
منعش .. وبارد .. ونكهات طب وتخير
لذيذ الصراحة
متعة كرة السلة
أذكر أيام المدرسة كنت دايما أشترك بفريق كرة السلة ونتبارى مع المدارس الثانية
وأذكر سنة من السنين
أثناء التدريب طحت وانكسرت إيدي
عقبها أمي ما قامت تخليني أشترك
لازلت أحب كرة السلة
وناسة
pearl
ياهلا لؤلؤة .. وينج قطعتي
فعلا الإسطوانة ما تتغير نفس الشي
وللأسف اسطوانة مشروخة من كثرة التكرار
مع مدرسات! لأ لا يحوشك
جربت مرة وااااااي لأ
جني قاعدة بمدرسة .. غير التشكي من الناظرة والأبلات والطالبات وأولياء الأمور وسوالفهم
فدوتن لج عجيبة هالأغنية
سمعيها من سليمان الملا .. رهييييييب
كلامها حلو .. حب راقي
الإستاذ بلاليط
ياختك من الحرة إلي بقلبي
واقعنا مكرر .. إيه ليش عاد؟
نبي تجديد
الله يعز شانك
أشكرك عالإطراء
مشاري
تقصد اليمعات إلي بالدوام
عن نفسي أتجنبها لأن فيها كلام وايد .. وهذرة مالها داعي
أرفض أكون أحد الأعضاء
انت نسيت شي
وين الجاي والبقصم؟
وين القهوة والحلو؟
وين الحليب والكعك؟
وين الدرابيل إلي بالزعفران؟
وين السمبوسة .. وين الفلافل .. وين الجباتي
وين السندويشات؟
أفا ناسي ... ليش؟
بس تدري يا مشاري الفراغ أهو إلي يسوي هالأشياء
زائد اليمعة والسوالف تحث عالأكل
مدام تتنرفز من يمعات الحريم وقرقتهم
شالا بالالا
سوالف حريم
حرييييم سوالف
هاهاهاهاها
سوالف حرييييم وين ما تروح سوالف حرييييم
اهداء من يني المصباح
مع شوية من بخور أم جاسم
خخخخخخخخخهههه
مطقوق
آنا من الصبح قاعد أتحلطم شحقى؟
عاوزة حاجة جديدة
بدي شيي جديد
أبي شي يديد
يبيلنا تحديث بيانات
وللسوالف فورمات
لا ياشيييخ! .. مالاكش خلئ
سم بالرحمن .. وعطنا من هالبوستات الطيبة الفرفوشية وانت يصير لك خلق
وإلا تدري شلون غير بدلة مدونتك
والله إلا أطفرك اليوم
أو ممكن تغير لونها
إذا تبي اقتراحات بهذا الخصوص آنا حاضر
تدري بعد .. خبرة بالتغيير والتبديل
ههههههههه
فراولتي اللذيذة
يامسا الورد والعنبر
صاجة .. ملل وروتين يذبح
بس تدرين الشي بإيدينا
لأنه إحنا إلي نغير ومو الشي أهو إلي يتغير
وإذا نبي التغيير ... صدقيني .. يصير
الله يهدينا
ومثل ماقلتي الحمدلله على كل حال
الحب البنفسجي
بيبي
كلامج صحيح امية بالمية .. لما نتكلم عن ذكريات الطفولة مع الأقارب ... نضحك من قلب وماودنا السوالف تخلص
لأنها سوالف فيها مصداقية وبراءة طفولة ومقالب والحياة كانت بسيطة وكل شي كان فيها عفوي
مو تدرين السوالف على حسب المواسم
صيف .. شتاء .. رمضان .. سفر
حلو التنويع جزاهم
إيه إيه .. تلاحقي على عمرج ياوخيتي إحنا ألحين على باب شهر 7 يعني بقى شهر واحد فقط لاغير
بس يمديج؟
موتاخذج العيلة وتسوين ريجيم قاسي
ديري بالج
باسكن .. بسكوني حبيبي
أحبك حدي
والله حبيبتي إنتي مآزرتني بكل شي
آنا عندي زئير الأسد .. وعالمستقبل الله يعلم
يوم الثلاثا
الأريل مالي موديله قديم ف يبيله تضبيط
كل يوم جديد بأيام الإسبوع يوقف عند موجة
يعني
السبت .. لا أحد يحاجيني
الأحد .. ما أستقبل مكالمات
الأثنين ... أنطق بس بكلمتين
الثلاثا .. نوم
الأربعا .. أبيه يخلص بسرعة
ياختج ولا حلم
لأنه تدرين الأحلام إهي الدلالات بهالوقت
أمبيه بيبي .. مافي ولا حلم
وإن حلمت ياني .. حلم من كان ياماكان في قديم الزمان .. آنا أيام المدرسة بشرايطي بشباصاتي بعفستي
حلم داثر
فدوتن لج عمري وكل إلي تبينه
عين خلج ما تشوف إلا غنتي زينة
وايد أحب هالأغنية
أطرشلج إياها رنة
هازرين للتيبين
flirty
أمبيه وويهويييي
سوالفكم وسوالفنا نفس الشي بس بوجه مختلف
الريجيم
فيه حريم جذيه وفي حريم جذاك
بالعكس ألحين مع التطور الحريم قاموا يحرصون عالضعف وأسهلها بعد واختصار للوقت
مثل
تحزيم معدة
شفط
نحت
بس هالحلول يبيلها نقدي
الزواج
انتوا عندكم حل إذا المرة صارت متينة
إنزين شالحل إذا الريال صار متين؟؟؟؟؟؟؟
آه منكم يالرياييل
الدوام
البنات غير عن الحريم إلي مسؤولة عن أسرة وبيت وعيال وزوج .. البنت وقتها ملكها .. ف راح تلقى الإهتمام والعناية لها وقت أكبر من عند الحريم
ترى المسؤولية تاخذ من الوقت .. بس هم أرجع وأقول فيه نوع من الحريم يحافظون على نفسهم برغم المسؤوليات والبيت والزوج والدوام وتدريس اليهال
إنت قلتها بنفسك لوتلف العالم كله ماتلقى أحلى وأجمل من المدام
العشرة الطيبة إهي الأساس
مناف
هلا بالي لفانا يا هلا به
حياك الله
إيه هذا إلي ناخذه من السوالف الحركات والأكشنات
وبالطبع تكون لها ذكرى
سعدت بزيارتك
ومشكور وايد
Post a Comment