ربما هالموضوع متكرر .. لا أعلم لكنه بإزياد على أرض الواقعفي كل مرة نتكلم عن حنان الأم وعطاءها الممتد لكن اليوم راح نتكلم عن العكس
في وقتنا الحاضر قمنا نشوف أشياء عجيبة غريبة
الإسبوع الماضي كنت أتمشى مع رفيجتي بأحد المجمعات
قررنا نحجز حق فيلم وإلا الدور ماااااشالله كله هنود وتعددت اليونيفورمات
قلت حق رفيجتي: وين الناس؟؟؟؟
قالتلي: كاهم الناس .. الخدم مع اليهال
آنا: أمبيه .. فيلم الساعة تسع الحضور خدم ويهال .. وين الأمهات؟؟ وين الأبهات؟؟
No Comment
وألتفت الصوب الثاني ألقى معاق على كرسي ناطر وعليا أهو مع الشغالة والسايق برة عند مدخل السينما
ما يندرى عاد بيدش الفيلم .. وإلا ناطر أهله
طبعا الشغالة لاهية تبلع .. والسايق لاهي بالموبايل
يعني ليش...؟؟
بالله هذي حالة .. والله ما أدري شنو الواحد يقول بهالموقف
يهال صغار .. نتف .. هادينهم مع الخدم والسواق ليه تالي الليل
آنا ما أقول الكل .. أقول البعض
وهذا عدي عن الأمور إلي نسمعها
أم .. تسافر .. وعمر ولدها أقل من أربعين يوم تتركه عند أهلها
عشان تجهز حق حفلة الإستقبال .. شغل برة
لأن الهم أصبح الناس وردة فعل الناس .. سوت حفلة .. إتينن ..البدلة روعة .. الدي جي عجيب .. إلخ .. إلخ .. إلخ
الأدهى والأمر
أساس الأمومة .. والشعور إلي تحس فيه الأم وكأنها ملكت العالم أجمع
شعور رضاعة الطفل .. نعمة من رب العالمين
الأمهات يبتعدون عن الرضاعة الطبيعية
ليش؟؟ لأسباب جمالية
سؤال؟؟؟
على قولة الأوليين إذا ما كان في صلة حب وحنان بين الأم وطفلها
شلون بيحس فيها ويحن عليها لما يكبر؟
إذا ما أعطيه من قلبي وروحي .. شلون بيعطيني ليما أكبر وحين انقطاع سني
المستوصفات والمستشفيات
قمنا نلاحظ الخدم أهم إلي شايلين اليهال المرضى
نشوفه أحيانا يبجي من الألم .. وإلا دايخ من الحرارة
والشغالة طبعا بدون مبالاة .. بس شايلته
والأم تنطر الدور
سؤال؟؟؟
مو المفروض يكون الياهل المريض بحضن أمه؟؟
مو الفروض أهو بحاجة الأم في هالوقت؟؟
وأحيانا أشوف الخدم بالمطاعم يوكلون اليهال بإيدهم
يعني الياهل ياكل من إيد الشغالة مباشرة
عيل الأمرااااااض حق عيالنا من وين يت؟؟؟
وألحين الموضة
الشغالة .. تودي المدرسة
الشغالة .. تدرس
الشغالة .. تريق
الشغالة .. تغدي
الشغالة .. تعشي
الشغالة .. تعلم الصح من الغلط
الشغالة .. تمشي وطق سوالف
الشغالة ممكن .. نشبك عالماسنجر وهات يا تشات معاها
آنا عارفة الحياة صار فيها مشاغل وايد ولابد من الخدم
بس شوية .. مو كل الإعتماد عليها
ليش ضاعت منا الأساسيات؟
ليش قمنا نتخلى عن أمور واجبة وأساس بحياتنا من أجل أمور جانبية؟
بليز بليز بليز بليز بليز
الأمومة .. نعمة
من ضيعتها .. فاتتها الدنيا كلها
ترى كتبت هالبوست .. من حر مافي قلبي عاليهال إلي شفتهم
ديروا بالكم على عيالكم
هم قرة أعينكم
كلكم أحبكم
