بصراحة تستاهل التكريم على المسلسل الجميل "الفرية" قصة .. حوار .. أداء كله كان رائعآنا أعتبر حياة الفهد .. ويمكن البعض يشاركني الراي
إنها تمثل الأم في كل بيت في الكويت
شخصيتها .. كلامها .. تعبيرات وجهها .. ضحكتها .. نبرة صوتها .. مثال للأم الكويتية الحنون إلي دايما تتفانى من أجل عيالها وبيتها
أذكر أمي كانت مسافرة في إحدى الرمضانات السابقة
كنت آنا والوالد واخواني الصغار بالبيت .. آل يعني بطبخ لهم
أبوي ما كان عنده أي اعتراض على طبخي .. بس النزق التوأم ما كانوا يسكتون من التعليقات
طبعا كانوا يطفروني محاولات .. عشان نلهي نفسنا عن غياب الغالية أمي
لا .. بس عدت .. الحمدلله بيضتها
المهم كان ينعرض لحياة الفهد مسلسل قبل الفطور مباشرة ... من المقدمة ليه النهاية وآنا مجابلته
أو ساعات أطلع من المطبخ وبإيدي الملاس .. وإلا سجينة السلطة
وأوقف عند باب الصالة وأجابل المسلسل
وعشان أخاف لا الطبخة تحترق .. تشوفوني مابين الصالة والمطبخ
وأيضا أشوف الإعادة .. لأني كنت أشوف فيها أمي
بهيئتها
بحركاتها
بكلامها
بتلقائيتها
ولما تبجي ... لا شعوريا تدمع عيوني
قشمرتها .. وخفة دمها .. لطيفة عالقلب
وايد أحب حياة الفهد
هي متواجدة في كل بيت
وفي كل شخصية أم كويتية
حياة الفهد .. لازالت في القمة
أتمنالها كل التوفيق والنجاح ومنها للأعلى انشالله
وتستاهلين كل خير يا أم سوزان
14 comments:
شفت التكريم
والصراحة تستاهل
وخالد البريجى يستاهل لان ممثل ممتاز الصراحة
ولكن اللى حز بنفسى اكثر من شغلة
اولا تلفزيون الكويت ما اخذ انتاج ولا واحد من هالمسلسلات
وبعدين وين الممثلين الكويتين؟
ترى لما طالعت ماكو غير هذيل ؟
وتستاهل حياة الفهد
العزيز مشاري
خالد البريجي بعد يستاهل .. تعبيرات ويهه تونس ومعبرة
ويضبط الأدوار
ويختار إللي يناسبه
انت عارف إنه عندنا سوء توزيع .. للأسف
وكل الإنجازات قاعد تتجه لشركات خارجية
شفت شلون!؟
المشكلة مافي تنظيم ولا تشجيع للحركة الفنية هذاك قبل أيام الفنان المبدع والذي لا يتكرر أبدا
الفنان / صقر الرشود
هني كان الفن في القمة
تحس يبرق ويلمع مقارنة بالحركات الفنية التي حولنا بالجوار
ألحين مافي تشجيع ولا كفاءات تنضم لقافلة الفن والمسرح
المبدأ صار على أساس الشكل واللوك
لاحظ في كل رمضان في ممثلين جدد .. تحسهم بدون دراسة أو متخرجين بتخصص نفس المجال ولا عندهم خبرة
أعتقد الشئ يعتمد عالمعارف
فتلقى المبدعين قلة
وللأسف ما يتكرم الفنان وينذكر إلا بشيئن لما يضرب معاه مسلسل
أو
عند الرحيل
مثلا الفنانة مريم الغضبان
والفنان خالد النفيسي
للأسف تلاشى ذكرهم ... مع إنهم أعمدة الفن .. إلا اللهم بعض من أعمالهم تنعرض
المفروض بين وقت ووقت يخصصون لهم برنامج عن حياتهم .. عن عطاءهم الفني
لكن .. للأسف ما يتوفر عندنا هالشئ
تستاهل ام سوزان
نتمنى لها كل خير و سعاده و عقبال جوائر اكبر و اكثر
بركــان
تستاهل والله
صج ما تابعت المسلسل
بس سمعت عنه كثير
حلو الواحد يكرم في حياته
فعلا حياة الفهد قمه بالاداء والتعبير ..لي بغيت كوميديا تضحكك ولي بغيت دراما تبجيك..صج فنانه معبره.. مادري هالجيل من الفنانين لي راحو شنو بيصير بالفن الكويتي بنجابل شيماء علي وربعها...
بركان
حيالله من زارنا شهالغيبة
عودة حميدة
روعة حياة الفهد .. آنا وايد أستانس على مسلسلاتها سواء
كوميدي أو تراجيدي
إلى الأمام دائما
ريما
التكريم شئ جميل .. الواحد يحس بإنه ترك بصمة بالحياة
القنوات الخليجية قاعد يعيدونه بين فترة وفترة
شوفيه وايد راح يعجبج
مايصير يكرموني آنا بعد؟ شفت المسلسل ثلاث مرات
تكانة
للأسف إيه .. أصبح الفنانين ألحين
تبع النيولوك والأشكال والألوان
والأزياء
ماقام يصير فيه تركيز عالأداء وضبط دور الشخصيات
الله يعين
نحو كويت افضل
نحو حوار ديمقراطي ليبرالي راقي حر
ندعوكم للمشاركه في الشبكه الجديده
شبكة الحوار الليبرالي
www.secularkuwait.net
أم سوزان تستاهل كل خير
كافي انها بنت الكويت صج
اليوم كان افتتاح مهرجان المسرح
وكرموا عشر فنانين
شي طيب يكرمونهم على حياتهم
على فكرة حفل الافتتاح كان روعة
اللي ما حضر الافتتاح
خل يشوفه بالتلفزيون
خصوصا الكلام اللي انقال
عن صقر الرشود وخالد النفيسي وحسين الصالح الحداد وعبدالرحمن الضويحي
الله يرحمهم جميع
ودمتم بود وحب
إلا الدستور
أشكرك عالزيارة والدعوة
شكرا
سلوقا بولوقا
تلقائيتها وتمثيلها بصراحة لا يعلى عليه مقارنة مع أبناء جيلها
كل الأسماء إلي ذكرتهم زائد عبدالعزيز المسعود كان أيامهم الفن ذهبي يلمع
عطاءهم وحب الناس لهم من خلال تلقائيتهم وبساطتهم
لازالوا في قلوب الناس
رحمة الله عليهم
فعلا تستاهل ام سوزان
كل شي فيها يشرح القلب
طيبتها حنانها طريقتها كل شي
الله يوفقها يارب
شهد
انسانة روعة بالتمثيل
تحسين ما قاعد تمثل كأنه حقيقة وواقع
يعطيها الصحة والعافية
مرورج شهد وعسل
أشكرج عالزيارة الأولى
Post a Comment