من يومين كان عندي شغلة مع إحدى الشركات .. وبالطبع تم تحويلي لقسم خدمة العملاء
وكان عالطرف الثاني .. امرأة صوتها جرئ .. ومن خلال طريقة كلامها الواحد يقدر يستشف شخصيتها
وإهي ماقصرت .. مشكووووورة على سرعة الخدمة
ومن بعد انتهاء الفنيين .. اتصلت فيني تسألني عن رضا العميل والخدمة المقدمة من قبلهم
ولأنها ذات شخصية مرحة جدا الحديث طال شوية
وهذا الحوار إلي دار
إهي: تصدقين عاد إنتي أول عميلة خلال اليوم كله
آنا: ليش؟
إهي: عملائي اليوم كلهم رياييل .. وبنهاية الدوام كان حظي سعيد فيج
آنا: آنا أسعد .. بس عادي هذي طبيعة شغلج .. وأكيد إنتي تعودتي على هالشي وأطباع الناس المختلفة
إهي: صاجة .. بس يا ختي الرياييل مادري شفيهم
آنا ساكتة: .... بدون تعليق
إهي: بس يسمعون صوت وحدة عالتليفون ع طول يبون يكونون علاقة .. والله العظيم آنا متزوجة وأقولهم نادوني بأم فلان .. بس ياختج ماكو فايدة
آنا: مو الكل
إهي: وإلي أستغرب منه .. المتزوجين
آنا: شحقى؟ وإش ماله؟ عندهم زوجات كل الأمور مملية من هالناحية
إهي: لا خبرج عتيج
آنا: .. بدون تعليق
إهي: والله ما ألومهم .. آنا قبل كنت ألوم الشباب بس ألحين ألوم البنات
آنا: ليش؟
إهي: ياختي من هاللي يشوفونه .. لبس .. وموضات .. وألوان .. وكل الأشكال
آنا: بس أكيد الزوجات قايمين بواجبهم .. وما أعتقد في امرأة بالدنيا .. ما تحب تكشخ وتتسنع لزوجها .. حتى وقت الطلعة والزوارة .. شوفيهم دايما يسعون لأحدث صرعات الموضة والملابس والعطورات .. هذا كله من عشانه مو عشان ريلها وراعي بيتها وأبو عيالها
إهي: إيه .. بس البنات .. يتفننون وما يخلون شي بهاللبس والموضات
آنا: صدقيني .. ساعة الصج .. الريال مهما يكون .. ترى بيرجع لبيته وزوجته .. وما يهمه الشكل واللون والمكياج والذي منه
إهي: الجمل مايطالع ... سنمه
آنا: ألله .. شدعوة مو لهالدرجة
إهي: عيل شتسمين هالتصرفات؟
آنا: مادري .. لأني ما أعرف ظروف الناس إلي تسوي جذيه
إهي: يعني معذور؟
آنا: آنا ماقلت معذور .. بس لازم ننظر لأصل المشكلة ونبحث بأسبابها
إهي: آنا أقول أكيد الخلل بالبيت
آنا: تصدقين عاد آنا ضد هالرأي تماما .. وشكثر أسمعهههههه .. شكثر
ودايما يقولون .. لو مافي شئ ناقص بالبيت جان ما اضطر للطلعة .. برة البيت
إهي:إيه .. عدل
آنا: آنا أقولج فيه رجال غاية بالإحترام .. والذوق .. وخصوصا مع مشاكل البيت
وفي ناس لأ يمكن العكس وهذا كله راجع للبيئة والتربية
إهي: بس هذا شي مفطور عليه الريال
آنا: بس فيه فرق ... بين إنه الإنسان ينجرف ورا فطرته من غير الحساب للبيت وبين برغم المشاكل والعفسة إلي داخل البيت لا ينظر للخارج .. لأنه بالأساس يحترم بيته وأهل بيته
ف لا تحطين الكل في قالب واحد
إهي: .. ممم يمكن وجهة نظر صحيحة
آنا: كل له رأي مختلف .. في مواضيع مختلفة
في إحدى المرات رأيت أحد البرامج التربوية والإجتماعية تناقش هالموضوع فقال أحد الضيوف
إن القاعدة إلي ذكرتها الإخت فوق ألا وهي في حال وجود نقص في البيت راح تكون ردة فعل الرجل معاكسة لباب البيت
واتفقوا الضيوف على أنه مسلمة من المسلمات بالحياة
وآنا أقول .. مو الكل
فيه ناس تحب من قلب
في ناس تود من كل قلب
وفي ناس بيتهم وأهل بيتهم عندهم بالمقدمة
الأساس هو الحب والإحترام
لأن الإنسان إذا ماكان بداخله قيمة للأشياء ف على الدنيا السلام
ومن أعظم القيم الداخلية هي الحب والإحترام
8 comments:
وااااي يحليلها واهيا عادي بس تسمع صوت ابنيه تشكي لها الحال
;p
والله اثبتي انج صبوووره + مستمعة جيده = شخصية رااائعة
--> شرايج بتحليلي
;)))
والله ياوخيتي ماعندي اي فكره عن هالموضوع
بس اللي اعرفه ان فيه عندنا ديننا فيه تنظيم حق حياتنا كلها سواء معاملاتنا او عباداتنا او غيرها من الامور المتعلقه فينا
شوفى :) بعلق ولا تطفرين منى
هالمرة يمكن جيكرة
لان اللى تقول جذى يا اما مو مصدقة عمرها او طايحه بجبد نفسها
والا شنو كل واحد يكلم وحدة قالها ابى اتعرف عليج و علاقة
ليش يبه احنا اندش شركات ووزارات وكل مكان ندش بادب ونطلع بادب
ولو ان فى بعض الشباب المتزوجين يدش بادب ويطلع بادب بسبب خوفه من ان المكان تشتغل فيه وحدة تعرف مرته :)))
بس المحترم محترم سواء عزوبى او متزوج
مشكورة على البوست الحلو
اي والله يا مشاري .. ترى اصابعج مو سوى مو كل الرياييل عقليتهم وحده ..
ولا كل الرياييل يفكرون بالعلاقات وووبس ..
والله شكلها حدها هذارة هالمرة !!
الله يعين اللي معاها بالمكتب بس ..
هههههههه D:
ريلاكس
يا هلا
خوش تحليل
أخجلتم تواضعي
عدل .. بس الإنسان يحكمه الهوى .. إلي أهو هوى النفس .. وكل له نظرته ورؤيته لمواضيع الحياة
مثل ما يقولون الناس أجناس
أسعدتيني بزيارتج الميمونة
مشاري
أفا عليك .. إخذ راحتك وبزود بعد
آنا معاك بهذا الرأي وأقول مو الكل نفس الشي
بس إهي الله يهديها وايد توسعت بالموضوع
بالعكس في رياييل محترمين جدا حتى بغياب زوجاتهم
كله راجع للبيئة والتربية
والأساس .. الدين والرقابة النفسية
إهي حشرت الكل في زاوية وحدة
وهالشي مايصير
الموقف إلي إنت ذكرته .. صدقني آنا ما أسميه خوف
أسميه مشاعر غير قابلة للوصف وكذلك ممزوجة بالإحترام للزوجة .. إحنا نقول .. أو الظاهر لنا وكما عودنا المجتمع .. إنه خايف من مرته تعرف ولا تقوله شي .. لأ .. إحنا إلي شايفينه الظاهر وماندري عن ما في الداخل من مشاعر واحساس ونوايا وإلي مطلع عليها رب العالمين
آنا ما أعتبره خوف
إذا أهو حريص على إن زوجته ما يوصلها شي فأهو خايف على زعلها وإذا إهي قالتله شي عن هذا الموقف .. فهذي غيرة عليه والتحليلين ينصبون في مصب الحب
تعجبني نظرتك للأمور دائما واقعية
العفو أخي العزيز
Roogyz
حيالله من زارنا
وآنا أيضا مع هذا الرأي
مو الكل نفس الشي
الناس أشكال وأرناق
إهي ماشالله عليها تاخذ وتعطي واضح إنها من الناس إلي ماشالله بسرعة ياخذون عالواحد
شكرا عالمرور الأول
الله يعييييييييييينج
مسكييييينه هذي فيها طاقه قرقره و هذره مكبوووووووووته
لوير
مسكينة بعد شتسوي .. ساعات الواحد يبي يتكلم مع الأشخاص إلي يصطدم فيهم من غير سابق معرفة ..ومن غير سبب
فقط من أجل الحديث مع الآخرين .. آنا أقول في أسباب خفية
يمكن كانت مضغوطة أو مالها خلق .. أو حاسة بالملل ..أو لأي سبب كان
في ناس وايد جذيه
أذكر مرة ما كنت دالة مكان شركة استشارات هندسية بالديرة
دقيت طلعلي نفس الموظف إلي كلمني الصبح وعشان يدليني .. تحفة .. لما ما دليت .. قالي آنا شسوي .. أفلع نفسي بالقلاص إلي جدامي .. ما يكفي النسرة إلي عندي بالبيت .. انتوا يا الحريم غريبين
آنا يتني الضحكة
بس عقبها فهمت إنه مضغوط حيل وعنده مشكلة ولا شعوريا قاعد يتكلم عنها
ليش يقول حق شخص غريب مايعرفه شنو عنده بالبيت ماله داعي
لكن الإنسان أحيانا يكون تحت ضغط يخليه يتكلم
Post a Comment