حبايبي

حبايبي وحبيباتي راح أنقطع عنكم مدة اسبوع

اجـازة قصيـرة

راح أوله عليكم واااااااااااااااااااااااااااااااااايد

كل الحـب والتقديـر لكـم

أشوفكـم علـى خيـر انشـالله

إلـى لقـاء قريـب

ادعولي

الشوق رجعنا

إهــــــداء إلـــــى العزيــــــزة الغالــــــية

Purpuloius

كم أعشق الإبحار بالماضي

وكم وكم استمتع بهذا الإبحار

تحجينا عن ذكريات وايدة .. لكن ذكرتنا بيربل بأيام مسرحيات هدى حسين

أيام التسمر جدام التلفزيون بس تطلع لها مسرحية وخصوصا أيام العيد الصبح

الله ياهي أيام .. كنا نجهز الملابس من الليل كل شي مرتب .. وبعد الحنة

الوالدة كانت تحني إيدنا من الليل ونقعد من فير الله مستانسين وبعد الغسال والريوق .. وعلى فكرة الريوق لازم وشئ أساس وجود الدرابيل والحلويات العربية .. وعقبها نكشخ .. ونتعطر .. ومسوين الشعر سشوار .. وإن كشخنا ... يحليلنا أيام قبل .. الكشخة بالفير .. بس وناسة يوم العيد له تحضير خاص .. وبعدين إتيي مرحلة الذهب .. تذكرون جف الذهب عبارة عن خمس خواتم متصلة بسلسلة متصلة بأخرى كسوار حول الإيد كان خاص بهالمناسبة .. والجنطة كنا نستانس عليها يعني كبار .. ومرت أعياد هبينا بموظة الحيول الذهب وبعدين بعد الكشخة والتعطر والتخنن .. نروح نسلم عالوالد والوالدة

والله احنا عيايرة .. ولا جنه الوالدة ملبستنا ومكشختنا .. آخر شي نسلم

يالله .. عيد ونبي نسلم واحنا متزقرتين

أذكر بأحد الأعياد .. رحت أسلم عالوالد (كنا صغار) ياية مجبلة بسلم جان أقوله أيامك سعيدة يومها أبوي وأختي ضحكوا علي ضحك

مادري شفيني مستعيلة الظاهر عالعيدية .. وبعدين نروح بيت كبير العايلة .. بيت الخال رحمة الله عليه الكل يتيمع

عاد اليهال حزتها كل وحدة تطالع الثانية وتبي تطلع أحلى وحدة .. بس كانت أجواء نستشعر لحظاتها لحظة .. لحظة

كان في لذة في دقائق وساعات هالأيام .. أذكر أيامها خالي الله يرحمه .. فوق العيادي كان يجهز لنا هدايا من جميع الأشكال والألوان والله ليلحين أذكر الفرحة بعيوننا وإحنا نختار ونستانس

المهم اليهال يومها عارفين البرامج قبلها بيوم وإلي من ضمنها مسرحيات الأطفال

ما تتخيلون الهدوء إلي يصير بس تطلع المسرحية .. وماشالله عيال العايلة في هذاك الوقت كلهم من سن واحد .. تخيلوا ماشالله قش كامل من الأطفال أمام التلفزيون .. مع إنه نكون حاجزين لمسرحية الموسم العصاري الساعة أربع .. إلا إنه حبنا لمسرحيات الأطفال كان حب عجيب .. وبعد ما تخلص المسرحية .. نتجه لمطعم تذكرونه مطعم ويمبي تخيلوا شكلنا

السايق بروحة معانا إحنا بس .. بس روس يهال بالسيارة ... الله يرحمه السايق عشرة عمر مع العايلة .. كان يخاف علينا .. كان يلعبنا .. يزرقنا الجمعية .. الفرع .. وهالطلعة كانت عندنا شي لأن الأهل حريصين حييييل ما يخلونا نطلع بروحنا بس بهالأيام نزرق ومع مجموعة كبيرة من الأطفال الصغار إلي أهم إحنا .. وبعد ما يعرفون الأهل بهالطلعة ننزف بعد العيد .. عادي مو مشكلة .. المهم استانسنا وخلصنا

وبعد ما خلصنا عيادينا عالجراقيات والمجسمات المطاطية إلي تكبر لما تتنقع بالماي شي على شكل بطة .. شي على شكل قطوة .. وشي على ديناصور .. وإلي موجود لونين فقط لا غير الأخضر والبرتقالي نترس بطول ماي الصحة ونحطهم فيه .. يعني اختراع .. يحليلنا وإحنا صغار

المهم عقب الغدا نريح شوي .. وننطلق للمسرحية طبعا مع العمام

عاد يبتلش فينا .. حنة من كل صوب .. هذي قعدت على شعر هذي .. والثانية فركيتتها طاحت تحت الكشن وهذا مضيع عياديه .. والثاني قاعد يبجي .. حشاكم جوتيه ضيج عليه .. وهذاك زعلان ومعصب عشان إلي يمه قعد على دشداشته وتعفست .. والثانية مقلدمة عشان ماقعدت جدام بالسيارة .. ومواويل اليهال بالعيد طويلة .. بس تونس

المهم نوصل المسرح .. يظة وصيحة اليهال .. والوناسة على ويه كل طفل .. يبدي العرض وأول ما تطلع هدى حسين عالمسرح نصفق تصفيييييييق حااااااااااار .. أذكر مسرحية الواوي وبنات الشاوي كنت من الحاضرين لها ماشالله عليها عندها جمهور عجيب وحب لا محدود من قبل الأطفال

برأيي الخاص كانت القصص والقيم إلي تتناولها عالية ترتفع بعقل الطفل .. إضافة إلى عنصر الإبهار وهو الديكور والملابس والمكياج والأغاني وتسجيلها الصافي .. يعني باختصار .. إهي تقدم عمل متكامل .. مسرحية ليلى والذيب ملينا من هالقصة لكن اسلوب طرحها عالمسرح كان غير .. شرايط أغانيها للأطفال .. كل اغنية تذكرني بذكرى .. ومكان

أغنية سمسمية

اغنية بدا يمشي بدا

القطار السريع

عيد ميلاد سعيد

دق الجرس

هية بناتي

بيبي متوه

واغاني مسرحياتها

كانت لها ذكريات

بس ألحين مسرح الطفل للأسف قائم على أبطال المسلسلات الكارتونية .. والحوار الضعيف .. وللأسف المؤلفين ليلحين يعتقدون إن جيل الأطفال الحالي .. عقول صغيرة

مايدري إنه أطفالنا بهالوقت في رؤوسهم عقول أكبر مما نتصور

الوقت والأجيال في تغير مستمر

فهل من مجيب؟

كبرنا ... شوية

تكلمنا عن أيام الطفولة والبابايات والأحلام الطفولية

وفي هذا البوست كبرنا شوية وصلنا لنهاية أيام الطفولة

تذكرون أيام مسلسلات قبل إلي معاها نضحك من قلب لبساطة وخفة دم النكتة

تذكرون مسلسل العتاوية

مسلسل درس خصوصي

مسلسل خرج ولم يعد

أوبريت مداعبات شهر العسل

بساط الفقر

وأيضا المسرحيات الخالدة

علي جناح التبريزي

على هامان يا فرعون

طماشة

ضحية بيت العز

باي باي لندن

عزوبي السالمية

كانت أيام الوناسة والبساطة

كنا أيامها نتيمع كلنا في الصالة جدام التلفزيون مع إنه فيه تلفزيونات بالغرف الثانية بس كانت اليمعة والترابط شي أساس بالمجتمع

المهم بس تطلع المسرحية نجابل التلفزيون مجابل سنع .. والله لوإهي دراسة ما سوينا جذيه

وبعد كنا نشتري حلاو وككاو ما ناكله بوقتها .. كنا نخشه حق وقت المسرحية

تذكرون (لحية الشايب) الككاو المدور وفوقه خد العروس نص أبيض ونص وردي ومرشوش عليه جوز الهند

تصدقون إني ليلحين أسميه حلاو لحية الشايب ... اسم عريق ماقدر أتخلى عنه

أصلا ما عرف اسمه الأصلي ..بس أعرف هالإسم لحية الشايب .. إلي جيسه وردي فوشي .. بس ألحين كشخوه وسموه مارشميللو كوكونت بس حده لذيذ

وإهني أكيد تشتغل النحاسة والحرة نحر بعض .. ويا نبادل .. يا ما نعطي .. خيار ثالث مافي

طبعا أكيد خاشين متعة أكل الحلاو .. والنطرة .. ويالله متى تبدي المسرحية عشان نغوص بلذة الحلاو والككاو

فشي أكيد ما نعطي ... حزززززززززرة وأحكام السن .. بدأنا بالنمو لازم نحسس نفسنا إن عندنا أملاك وقرار

وأذكر كنت لازم أقعد جدام أخوي مع اسطوانة كل مرة: وخري ما أشوف من راسج

آنا إهني طبعا .. العناد يشتغل .. وأسوي نفسي ما سمعت

ويكرر مرة ثانية: وخري راسسسسج

آنا مسوية روحي ما أسمع .. بالمرة

وتشب النجرة وأروح أشكي حق أمي .. يمة شوفيه خرب شباصتي طاعي عنقوصي اخترب

أمي تضحك .. على مقالبنا ببعض

وآنا الدموع أربع أربع .. وأقوله: والله إلا أفشش تواير قاريك .. إنزين إنزين أوريك

وفعلا فششت التواير .. وعقابي منه كان الآتي:أخذ الباربي مالتي معاه المحسن وحلقلها شعرها عالزيرو بخمسين فلس

ويومها بجيت بجي .. وأهو يضحك .. شطانة .. عادي... بس كانت أيام كل ما أتذكرها أنتعش وأضحك

وتختلط معاها دمعة أمل مستحيل برجوع هذي الأيام

خلال هالفترة كانت الأسر مترابطة حييييييييل

يتيمعون وقت الريوق .. وقت الغدا .. وقت العشا .. وقت الأفراح من البداية حتى النهاية .. ووقت الشدة

كان شئ مهم جدا بحياة كل واحد عاش هالفترة اليمعة والتواصل الإجتماعي كان أولوية أولى

ما تنمد الإيد عاللقمة إلا والكل قاعد .. دايما أحب يمعة العشا .. تحلى السوالف .. والضحك .. والقشمرة

حتى أيامها كانت مطاعم الهنود محتلة القمة .. الجباتي الأسمر القديم .. السمبوسه ...والفلافل ... والبطاط الهندي

وبالطبع الخبز الإيراني الحار

و قبل العشا تحلى لعبة الحيلة بالحوش

كنت أستمتع فيها وأعتبرها لعبة التحدي

لكل يوم سبت .. أحد .. أثنين... لنهاية الإسبوع لكل يوم له نكهة خاصة فيه جو مميز

ألحين اختلف الوضع واختلفت العلاقات

أصبحت الأيام وحدة .. ومن غير طعم

والعلاقات الإجتماعية عبارة عن خيط رفيع

وعلاقات الأعمال والمنافع أصبحت هي الأولى

مادري ليش؟؟؟؟؟

العيب بالزمن؟ وإلا الإنشغال بالحياة؟؟؟ وإلا بالناس؟؟؟

أفكار .. آخر الليل

من أربعة أيام وآنا منبطة جبدي من كل شي .. لله الحمد ... وأولهم وحدتي إلي اختربت بوقت غير مناسب

وعلى مراحل .. مرة هوا حار .. مرة صوت من غير هوا .. بدعت العزيزة الغالية

يه الفني وأخذها على أساس إنهم بيصلحونها .. راحت الحبيبة وما رجعت

الله يهديهم ... طولوها .. لأن عندهم ضغط

قلت حق أمي خنشتري وحدة يديدة مت من الحر

جان تقولي: تصليحها بسيط .. نطري شوية .. وإذا إنتي حرانة .. نزلي بالصالة نامي

آنا: لا من قال إني .. حرانة! .. أصلا أخسي .. أقول آنا حرانة

قلت بنطر وأمري لله .. وأمشي بشور أمي .. لكن من غير النومة تحت

لأني أحب غرفتي ولا أقدر أنام في غيرها .. أحس إني مو نايمة

قاعد أروح الدوام دايخة وبعيوني النوم

أمي: قلنالج نامي بالصالة منتي راضية

جان أقول: يمة تدرين فيني أحب أنام والتلفزيون شغال .. فيلم عاطفي .. وجوه حلوة .. ابتسامة رقيقة

تبيني أسهر على راس غليص مع عجايفه ودماء تحت الأنقاض

لا لا لا مو قبول

ليش ما حطيتوا شوتايم تحت؟

أمي: نزلي وايراتج والريسيفر مالج وركبيهم بالصالة

رديت: أوللللا .. يمة مالي خلق .. خلاص خلاص خليني بالحر أحسن

طبعا من الفشلة وقصة الوجه جدام أمي قلتلها مالي خلق .. أتحمل .. الله يعافي وحدة الممر إييني منها طشار

وأيضا الدريشة المبطلة

إلي يوم بطلتها تسلطوا القطاوة هواش ونجرة .. طول الأيام ما أسمع صوتهم إلا هاليوم

بس بعدين .. الحر زاد .. وآنا بعد يالله خير أشكي من معدتي

مع الحر .. حسيت إن معدتي قاعد تطبخ من داخل .. وراسي قام يغلي

استسلمت للأمر الواقع وشلت شلايلي مخدتي وفراشي إلى الصالة .. وإسقاط عالنوم

أتقلب يمين ... يسار .. ماكو فايدة ماني قادرة أنام مع إنه برااااااد

ظهري تكسر من النومة عالأرض .. وأيضا للمرة الثانية أشيل شلايلي وأصعد غرفتي

وطبعا طارت النومة من عيني .. وبالطبع التفكير شغال

وقمت أقول حق نفسي .. بسج تفكير .. خلاص

وللليييين .. ليش إتيي على بالي .. بسسسسسسسسسس

خلاااااااااااص

أبي أغالط قلبي .. وأسلم لعقلي ... لكني مو قادرة

غصبت نفسي .. إني أفكر بشي آخر .. أي شي

لأني تعبت من التفكير .. أبي أنسى ... بليز الرحمة

جان إتييني أفكار جنونية

قلت .. لو إنه السيارات مصنوعة من الجلي جان شصير؟

وييه عاد ... إذا باص وبيلف .. مسكين يترطرط عند اللفة

فكرت لو إنه الأثاث من حلاو وككاو .. أمبيه بالحر يموع .. بس لذيذ

فكرت .. الواحد ليش مايقدر يترس غرفته ماي وتصير حوض سباحة؟

وبس يخلص .. يفج الباب ويطلع الماي ويرد أثاثه مكانه .. وخلصنا

عالأقل بالغرفة أمان .. مو مهددين بالتصوير البلوتوثي

فكرت لو الموبايلات من برد .. عشان الواحد بس ينقهر يحط حرته فيه وياكله

أوفييييييه شكثر أحب البرد غرامي

وأيضا فكرت .. ليش الواحد ما يقدر يقص شعره طويل؟

أروح الصالون .. وأقول حق الصالونجية قصيلي شعري طويل .. الله وناسة

يتني فكرة لو إنه نشرب ماي ملون وعلى حسب لون الماي يتغير لون عيوننا

زين والله .. نكشخ مع ألوان البدلات .. لا عدسات ولا غيره

لاحظوا كل الأفكار إتييب البرودة .. مو مني والله .. من الحر

دنيا ... غير الدنيا

من زمان وآنا أحلم أعيش في دنيا الباباي أو الرسوم المتحركة

أحس فيها عالم حب .. وأمان .. بدون حقد .. بدون كره .. ومن غير حسد

ولا في نجرة وهم وغم .. وعفسة .. وضيقة خلق

كنت أتمنى أعيش .. عالجزيرة مع فلونة وأسرتها

كنت أحلم .. بأصدقاء السنجاب سنان إلي دايما كانوا على قلب واحد

تمنيت أكون الأميرة ياقوت .. وأكون الفتاة إلي تحدت طبيعتها ومركزها في سبيل إنها تدافع عن الضعفاء

حلمت برحلات السندباد .. ولا زالت كل حلقة محفورة بذاكرتي

تمنيت أكون إخت غريندايزر ... عشان أصير من الأبطال

حلمت أكون مع هايدي في المروج والطبيعة الحلوة والبساطة في الحياة

كان ودي أسبح في البحر إلي يغوص فيه مسعود مع الديناصورة ميمونة

حلمت أكون مع زينة ومغامراتها مع هوبلا ونحول

وياما وياما حلمت أكون في دنيا قصص عالمية القصص المتجددة وفيها فائدة ونصائح قيمة

جدام بيتنا أيام الروضة من الخلف كان فيه ساحة تطل عالجانب الآخر للجيران

كنت أزرق منه عشان أروح لرفيجاتي بنات الجيران

وأمام باب البيت زرع .. كنت أخاف أدوس عليه .. اعتقادا مني إن ممكن تكون عقلة الإصبع بسمة وعبدو عايشين فيه

كنت أعيش مع الكابتن ماجد لما إييب قول .. كنت أستانس من صجي وأحتر إذا ما ياب قول

حياة السنافر بسيطة .. كل مشكلتهم شرشبيل .. عندهم عدو واحد بس .. ولاه وأثول وتخسبقه قطوته بعد .. وخططه كله فاشلة يا زينه من عدو مو أعداء ألحين ما يبينون ماتعرف العدو من الرفيج

كنت أحب حياتهم .. بساطة ودايما عندهم وناسة

وغيره وغيره من أحلامي إلي كنت أعيشها في عالم الباباي

كنت أحس .. إنه عالم كل شي متوفر فيه وبسهولة الحصول عليه

والأهم مافي نزاعات ولا هموم ولا وقلوب تشيل على قلوب

وإذا كان فيه مشكلة بين الناس انحلت بنهاية الحلقة وسعادة وأناسة وكأن شئ لم يكن

من ضمن الشخصيات الكارتونية المعروفة .. علاء الدين ومصباحه السحري وبساطه الطيار

تخيلت .. لو إن المصباح والبساط عندي .. بشنو أستخدمهم

المصباح .. أبي المارد يجمع كل الحساد والحقودين والملاعين بجزيرة وننساهم

أبيه يوقف الزمن ويصور العالم بصورة وحدة بكل أشكالها الحية

وأمسح أماكن الحروب والحرمان

وبعدين أتفرغ للزين .. أحقق أمنية كل حبيب وغالي

وأحاول .. هذا إذا رضى يني المصباح لأنه طلباتي كثرت العادة ثلاثة بس

بس آنا أبي زيادة .. ودي تنصلح الأحوال بالبيوت

هذا زعلان من هذا

وهذاك محارب الثاني

وهالعايلة مقاطة هالعايلة

وأزواج متزاعلين

واخوان مختلفين

وهلم جرا

أما البساط .. أبيه ياخذني بعييييييد بمكان فيه طبيعة حلوة .. وفوق الخيال

بمكان في هدوء .. سكينة .. مافي لا دموع ولا ألم ولا ضيقة بال

وأقعد واستمتع مع الحبايب

وطبعا أفتر شوي باليهال عيال خواني .. خل يستانسون

عزيزي وعزيزتي .. إذا صار عندكم المصباح والبساط السحري شنو ودكم تسوون

ضالتــــي

من زمان ... وآنا أدورك

من زمان ... وآنا أبحث عنك

من عمر ... وانت ضالتي

ما ولهت علي

ما وحشتك

ما اشتقت لي

سألت عنك بكل مكان .. وزمان

سألت العيون .. قالت مفارقني

سألت الروح .. قالت هجرني

سألت الدموع .. قالت رحل عني

ليش؟

ليش تخليني أحيا من غير أنفاسك

ليش تتركني بلهيب أحزاني وغيابك

ليش ترحل وآنا بأمس الحاجة لأحضانك

هنت

هنت وهانت أيامي عليك

رحلت وذابت روحي بين إيديك

أرجوك ارجع

وين ما تكون ارجع

تراني حيل احتاجك

دموع وآهات قلبي جرحت روحي

أنين جوفي ألهب ثنايا ضلوعي

من يداوي جروح قلبي غيرك

ومن يواسي دمع عيني غيرك

انت تظن بفراقك على الزمن أقدر

وبعد ما تركتني بنص الطريج أعبر

مادريت

مادريت وشصار فيني بغيابك

يا ليتك تدري

يا من يوصل لك أخباري

ويخبرك عن أحوالي

ما عليه .. إبعد .. إجفى .. اخذ وقتك

بس أرجوك لا تخذلني

وتوعدني

إنك بيوم ترجع لي

يا سلطان الروح

ومنى العين

و سعة القلب

الحنان .. ضالتي وضالة كل انسان

دلال الكلام

الكلمـــــة

الكلمة هي كل شي بحياتنا .. إهي السوالف .. القشمرة .. الشكوى

الشعر .. النثر .. الغزل ... وأحاديث الحياة الودية والعدوانية .. كل شي بدون عدد

الكلمة أحيانا تصعد الواحد فوووووق

وأحيانا .. تهبط فيه تححححححت

الكلمة الحلوة بلسم لجروح النفوس

وتطيب خاطر القلوب

و دوا لآلام الروح

للأسف ألحين صار الحال بالكلام المصفوف والمنمق .. تكاد الذاكرة تحفظه عن غيب من كثرة التكرار

وفي ناس تقابلنا بالكلام الجاف والجامد وأحيانا الجارح .. وإلي تدمع له العين

بوقتنا الحالي وفي ظل زحمة اليوم نحتاج كلمة صادقة .. تخرج من القلب .. نابعة من الأعماق

نحتاج كلمة تطيب الخاطر .. وتنعش ثنايا الروح

الوالدين .. بعد التعب والتربية .. ينتظرون كلمة طيبة من أبناءهم لا شكر إنما احساسهم بوجودهم

الزوج لي دخل بيته يشكي ويقول أبي أسمع كلمة حلوة أول دخلتي البيت

الزوجة لما تكون مستعدة تسوي أي شي عشان زوجها .. من أجل كلمة حلوة منه

وكذلك الزوج مستعد يسوي أي شي عشان خاطر الزوجة من أجل أن يسمع منها كلمة حلوة

المراهقين ليه إتيم وهام بأول حب بحياته ... يبي يسمع كلمة حلوة

صاحب القلب المكسور ... يروي لرفيج أو قريب عن حر ما فيه .. أمل منه يسمع كلمة حلوة

إنسان يبحث بين الوجوه العديدة والكثيرة بالدنيا من أجل أن يقابل من يلقي على مسامعه كلمات جميلة نابعة من القلب للقلب

الوحيد والحزين .. يحتاج كلمة طيبة ومدة إيد

المريض والمقعد يحتاجون كلمة تصبرهم وتعطيهم بالحياة أمل

وغيره وغيره من الأمثلة الحية بحياتنا

الكلمة لها وقع كبير عالإنسان

ممكن تصادف بحياتك انسان تايه .. وضايع بطريجه وبكلمة وحدة منك غيرت مسار حياته للأفضل

ممكن ناس ما نعرفها ولا تعرفنا من اللقاء الأول تسرد قصة حياتها .. احتمال مؤلمة .. احتمال تجربة قاسية

ويمكن .. متأثرين من شي معين بالحياة .. يتكلم لأن وده يسمع كلمة تطفي نار جوفه

في ناس تسعى وسعيها جدا كبير لكن حظها بالحياة قليل وغالبا ما تلاقي الإخفاق

بكلمة حلوة ومشجعة تشعل فيه روح الحماس والبدء من يد ويديد

مواساة الخواطر .. ممكن يمر بحياتك ومرات وايدة تصير .. يمرون عليك بقلوب مكسورة بعمق وتكاد وجوههم وعيونهم تتحدث عن ماتخفي أغوار نفوسهم بكلمة طيبة منك داويت خاطره وشعوره ويمكن لوقت بسيط أحدثت أثر على هالإنسان لكن المهم إنك سويت شئ حلو وجميل

الكلمة الحلوة باب لأي طريج مسدود

جمال الكلام .. من جمال النفوس

ما أجملنا ونحن نفشي السلام فتزداد محبتنا

ما أجملنا حين نحترم شعور بعضنا فيزداد تماسكنا

ما أجملنا حين نتكلم بطبيعتنا فيرتاح من معنا

ما أجملنا حين نتقيد بفن الكلام ففيه رقينا

حبيبك من الناس

قبل ما تقرا هالموضوع

ياليت

ياليـــــــــت

ياليـــــــــــــــــــــــــــــــــــت

تحط في بالك انسان غالــــــــــــــــــــــي عليك وتحبه وااااااااااااايد

وتركــز تفكيــــــــــرك على هالإنســــــان الغالــــــــــي

وبعدها تفضل اقـــــــــــرا

أبيك تكون لوحدك وانت تقرا هالموضوع

وأهم شي أبيك توقف مع نفسك وقفة صراحة

وبكل أحاسيسك أبيك تتخيل

اليوم انت معاه

أرضك إهي أرضه

وهواك هواه

اليوم أهو منك قريب وعندك

تسألني منو أقصد آنا ؟؟؟؟؟؟؟؟؟؟؟؟

أقصد حبيبك من الناس

لو ما تشوفه عالأقل توصلك أخباره ولو من بعيد

لكـــــــــــــــــن

عقب هاليوم ... تخيل لو مرة بس ... إنه ... إنه ... إنه

رحــــــــــــــل

فجأة وبدون سابق انذار

من هالدنيا اختفـــــــــــــــــــــــــــــــــــــى

ابتعد

وراح لبعيـــــــــــــــــــــــــد

بعيـــــــــــــــــــــــــــــــــــــــــــــــــــــــــــــــــــد

يرجعلك مستحيـــل

تتخيل معاي صح ... ؟؟؟

خلاااااااص

رحل عنك غصــــــــب

وخلاااااااك

انت وحيد

تايه

حاير

متألم

منصدم

يا ترى تقدر تتخيل في ذاك اليوم شلون بيكون حالك؟؟

بتصرخ ؟؟؟

بتصيح ؟؟؟

وإلا من الصدمة بتسكت وقلبك من داخل جريح .. ؟؟

حياتك بتمضي أكيد

بس !!! من دونه

أيامك بتعيشها عادي

لكـــــــــــــــــــــــــــــــــــــــــــــــــــــــــــــن

بدون صوته وشوفة عيونه

تخيل وش إلي ممكن تفقده ؟؟

صوته

حبه

حنانه

حزنه

ابتسامته

عطفه

شوقه

ملامه

طيبته

قسوته

عناده

براءته

سوالفه

قشمرته

بروده

عصبيته

قلبه

كلــــــــــــــــــــــــــــــــــــــــــــــــــــــــــــــه

تخيل شنو إلي ممكن تخسره .. ؟؟

حلمك

شمسك

روحك

بدرك

ليلك

عمرك

قلبك

كلــــــــــــــــــــــــــــــــــك

يا ترى بتلوم نفسك لأنك في يوم قسيت عليه وخليته !!!! ؟؟؟؟؟

يمكن جرحته وما راضيته !!! ؟؟؟

أو حتى في يوم يمكن تناسيته ؟؟؟؟

بــس ما يفيد ندمك اليوم

أهو خلاص راح وخلاك لحالك تتحسف على كل كلمة ضايقته فيها

أهو حبك مــــو شوية .. !! حبك كثيييييييييييييييييير

وإنت قسيت عليه

اليوم حسيت بحبه .. وتبيه اليوم يمك .. تبي تعوضه عن كل شي سويته

بس تلقى نفسك عاجز وندمان

عيل

دامه يمك اليوووووووم

حاول تحبه دووووووووووووم

كل غالي لك

يمكن ماتشوفه بعد اليوم

قول له أحبك ... ولا تنسى إنه بعد يحبك ويمووووووووووووت فيك

عشان ما تندم في يوووووم

الجمل مايطالع ... سنمه

من يومين كان عندي شغلة مع إحدى الشركات .. وبالطبع تم تحويلي لقسم خدمة العملاء

وكان عالطرف الثاني .. امرأة صوتها جرئ .. ومن خلال طريقة كلامها الواحد يقدر يستشف شخصيتها

وإهي ماقصرت .. مشكووووورة على سرعة الخدمة

ومن بعد انتهاء الفنيين .. اتصلت فيني تسألني عن رضا العميل والخدمة المقدمة من قبلهم

ولأنها ذات شخصية مرحة جدا الحديث طال شوية

وهذا الحوار إلي دار

إهي: تصدقين عاد إنتي أول عميلة خلال اليوم كله

آنا: ليش؟

إهي: عملائي اليوم كلهم رياييل .. وبنهاية الدوام كان حظي سعيد فيج

آنا: آنا أسعد .. بس عادي هذي طبيعة شغلج .. وأكيد إنتي تعودتي على هالشي وأطباع الناس المختلفة

إهي: صاجة .. بس يا ختي الرياييل مادري شفيهم

آنا ساكتة: .... بدون تعليق

إهي: بس يسمعون صوت وحدة عالتليفون ع طول يبون يكونون علاقة .. والله العظيم آنا متزوجة وأقولهم نادوني بأم فلان .. بس ياختج ماكو فايدة

آنا: مو الكل

إهي: وإلي أستغرب منه .. المتزوجين

آنا: شحقى؟ وإش ماله؟ عندهم زوجات كل الأمور مملية من هالناحية

إهي: لا خبرج عتيج

آنا: .. بدون تعليق

إهي: والله ما ألومهم .. آنا قبل كنت ألوم الشباب بس ألحين ألوم البنات

آنا: ليش؟

إهي: ياختي من هاللي يشوفونه .. لبس .. وموضات .. وألوان .. وكل الأشكال

آنا: بس أكيد الزوجات قايمين بواجبهم .. وما أعتقد في امرأة بالدنيا .. ما تحب تكشخ وتتسنع لزوجها .. حتى وقت الطلعة والزوارة .. شوفيهم دايما يسعون لأحدث صرعات الموضة والملابس والعطورات .. هذا كله من عشانه مو عشان ريلها وراعي بيتها وأبو عيالها

إهي: إيه .. بس البنات .. يتفننون وما يخلون شي بهاللبس والموضات

آنا: صدقيني .. ساعة الصج .. الريال مهما يكون .. ترى بيرجع لبيته وزوجته .. وما يهمه الشكل واللون والمكياج والذي منه

إهي: الجمل مايطالع ... سنمه

آنا: ألله .. شدعوة مو لهالدرجة

إهي: عيل شتسمين هالتصرفات؟

آنا: مادري .. لأني ما أعرف ظروف الناس إلي تسوي جذيه

إهي: يعني معذور؟

آنا: آنا ماقلت معذور .. بس لازم ننظر لأصل المشكلة ونبحث بأسبابها

إهي: آنا أقول أكيد الخلل بالبيت

آنا: تصدقين عاد آنا ضد هالرأي تماما .. وشكثر أسمعهههههه .. شكثر

ودايما يقولون .. لو مافي شئ ناقص بالبيت جان ما اضطر للطلعة .. برة البيت

إهي:إيه .. عدل

آنا: آنا أقولج فيه رجال غاية بالإحترام .. والذوق .. وخصوصا مع مشاكل البيت

وفي ناس لأ يمكن العكس وهذا كله راجع للبيئة والتربية

إهي: بس هذا شي مفطور عليه الريال

آنا: بس فيه فرق ... بين إنه الإنسان ينجرف ورا فطرته من غير الحساب للبيت وبين برغم المشاكل والعفسة إلي داخل البيت لا ينظر للخارج .. لأنه بالأساس يحترم بيته وأهل بيته

ف لا تحطين الكل في قالب واحد

إهي: .. ممم يمكن وجهة نظر صحيحة

آنا: كل له رأي مختلف .. في مواضيع مختلفة

في إحدى المرات رأيت أحد البرامج التربوية والإجتماعية تناقش هالموضوع فقال أحد الضيوف

إن القاعدة إلي ذكرتها الإخت فوق ألا وهي في حال وجود نقص في البيت راح تكون ردة فعل الرجل معاكسة لباب البيت

واتفقوا الضيوف على أنه مسلمة من المسلمات بالحياة

وآنا أقول .. مو الكل

فيه ناس تحب من قلب

في ناس تود من كل قلب

وفي ناس بيتهم وأهل بيتهم عندهم بالمقدمة

الأساس هو الحب والإحترام

لأن الإنسان إذا ماكان بداخله قيمة للأشياء ف على الدنيا السلام

ومن أعظم القيم الداخلية هي الحب والإحترام

ليش اخترتك؟

ليش اخترتك انت من بين كل الناس

ليش إن قلت أحبك أحس إني مرتاح

ليش حبيتك بكل مافيني من احساس

ليش إن جيت أضمك همومي ترتاح

ليش طيبتك في قلبي مالها أي مقياس

ليش شوفتك تمحي كل مافيني من جراح

ليش قلبي في حبك جد مفتون

وليش آنا أعشقك مهما يكون

لأن عندك احساس فعلا حنون

لأن فيك أدق وأرق الشجون

لأنك دايم تحسن فيني الظنون

لأنك تعشقني لدرجة الجنون

وآنا أقول ليش اخترتك وحبيتك

وليش قلبي خليته حلالك وبيتك

وليش ما أقدر أحب غيرك

ألحين عرفت ليش اخترتك يا أحلى ملاك

وليش حبيت فيك ذوقك وكل الصفات

وليش آنا ما أبي أعيش في حياتي إلا معاك

وليش حبيتك وما لقيت ظفرك بين الناس

عرفت ليش أحبك في كل حيني

لقــــــاء الخميـــس

تذكرون .. برنامج لقاء الخميس .. إلي كان يقدمه

المذيع المخضرم / ماجد الشطي

والمذيعة الرائعة على الشاشة / أمينة الشراح

بنرجع شوي بالزمن بقدم لكم فقرات منوعة اليوم .. يوم الخميس

لذلك حطيت العنوان لقاء الخميس

قلت أسامي! ... شالقصد من اسم فلافل .. إلي أعرفه إنها أكلة .. أو كنا أيام قبل نسمي إلي شعره يعد .. فلافل

أبي أعرف شئ واحد .. شنو الإيحاء إلي يبي يوصله مسمي الفيلم بهذا الإسم

وأيضا مفيش أسامي أقصد مافي أسامي

يالله أسامي ببلاش

وهاللفتة تذكرني باسم إحدى الأغاني الحديثة في فيلم عربي نزل بالسينما من فترة قريبة..

إسمها (بحبك يا ... ح) ماقدر أقولها لأنها خارجة عن الذوق العام

غريب .. بإسلوبك .. بغنائك .. لكني أستانس على حفلاتك والشيلة إلي تسويها

تسوي جو خاص ومميز فيك

الله يهداك بس! .. هذي آخراتها


يا رب الله يزيد الخير .. البردي شئ عجيب شوفته تسر الروح
أذكر قبل كان النساء الكبار يقولون لنا بس تطيح بريدية داخل الفم معناته بننجح هالسنة بالدراسة
أيام قبل كان في بساطة والحياة كانت .. سهلة وعفوية
هالصورة بردي .. أمس




آخر صورة إهي للمحمية إلي قام بإنجازها فريق الغوص والتابع لشركة نفط الكويت قام الشباب ببناء أكبر محمية في الشرق الأوسط
بصراحة مجهود يشكرون عليه .. انجاز وابداع
اسم المحمية: محمية شركة نفط الكويت
يعطيكم ألف عافية يا شباب الكويت ومنها للأفضل انشالله .. الله يوفقكم يا رب

تستاهل .. أم سوزان

بصراحة تستاهل التكريم على المسلسل الجميل "الفرية" قصة .. حوار .. أداء كله كان رائع

آنا أعتبر حياة الفهد .. ويمكن البعض يشاركني الراي

إنها تمثل الأم في كل بيت في الكويت

شخصيتها .. كلامها .. تعبيرات وجهها .. ضحكتها .. نبرة صوتها .. مثال للأم الكويتية الحنون إلي دايما تتفانى من أجل عيالها وبيتها

أذكر أمي كانت مسافرة في إحدى الرمضانات السابقة

كنت آنا والوالد واخواني الصغار بالبيت .. آل يعني بطبخ لهم

أبوي ما كان عنده أي اعتراض على طبخي .. بس النزق التوأم ما كانوا يسكتون من التعليقات

طبعا كانوا يطفروني محاولات .. عشان نلهي نفسنا عن غياب الغالية أمي

لا .. بس عدت .. الحمدلله بيضتها

المهم كان ينعرض لحياة الفهد مسلسل قبل الفطور مباشرة ... من المقدمة ليه النهاية وآنا مجابلته

أو ساعات أطلع من المطبخ وبإيدي الملاس .. وإلا سجينة السلطة

وأوقف عند باب الصالة وأجابل المسلسل

وعشان أخاف لا الطبخة تحترق .. تشوفوني مابين الصالة والمطبخ

وأيضا أشوف الإعادة .. لأني كنت أشوف فيها أمي

بهيئتها

بحركاتها

بكلامها

بتلقائيتها

ولما تبجي ... لا شعوريا تدمع عيوني

قشمرتها .. وخفة دمها .. لطيفة عالقلب

وايد أحب حياة الفهد

هي متواجدة في كل بيت

وفي كل شخصية أم كويتية

حياة الفهد .. لازالت في القمة

أتمنالها كل التوفيق والنجاح ومنها للأعلى انشالله

وتستاهلين كل خير يا أم سوزان

يالله نفرفش

كثيرة هي الصدمات .. وكثيرة هي العثرات بالحياة

نظرا للحالة المزاجية الراهنة

والصدمة القوية .. وآثارها

ف أبي أطلع من هالمود وأساسا مو عوايدي .. آنا أحب الفرفشة والإنبساط

فحبيت أفرفش معاكم

وأبي رايكم .. أي صورة تعبر عن الواقع

هااااااااااتشو

حدث ولا حرج

ما أطيق ريحة الزقاير على بعد أمياااااااااال ماواطنها بعيشة الله مادري المدخنين شلون متحملينها

ليش عاد؟؟؟

معقولة تكون هذي الحالة بعد الزواج؟

سحر بحر بوداوود

ياختي عليها .. يا ختي عليها

تغيرات الزمن

انشالله تكونون استمتعتوا

ترهمون لي

زهيرية من زهيريات

الشاعر المبدع / عبدالرحمن الضويحي

انتم ترهمون لي

انتم ترهمون لي وآنا لكم مرهم

أرهم مع إللي لجرحي بلسم ومرهم

وأرهم مع إللي يتشره ليش ما مرهم

وأرهم مع من فقدنا ساعة مرنا

وأرهم مع اللي يشارك حلونا ومرنا

وأرهم مع الإبتسامة وكلمته مرنا

ولا مني مريت يعاتبني بعد مر هم

إجازة سعيدة

صراحة ... اليوم

مشكلة إذا الملل تسلل للحياة

ليش الواحد يمل؟؟

ليش الملل أصبح ياخذ جزء كبير من حياتنا

في أيام الإنسان يحس بملل فظيع .. مع انه لله الحمد كل شي موجود

لكن يظل في ملل داخل النفوس

وهالمشكلة عند كل واحد فينا

ساعات نوصل لنقطة نقول فيها أووووه مليت .. أو .. أوووه زهقت

وغيره .. وغيره .. أصلا ساعات الواحد ينجك بسرعة من ويهه يبين إن مال من شئ

الملل أصبح جزء من الأيام

الحياة عندي .. مرتبة حسب الأنشطة إلي أحب أمارسها بعد الدوام

يعني .. مخصصة وقت لإهتمامي الأول وهدفي

مخصصة وقت لهوايتي .. الرسم

مخصصة وقت للصديقات والطلعة معاهم

وخلال هذي الأوقات مداعبات .. عيال خواني وخصوصا ثريا الصغيرونة

وخط السير المفتوح للجمعية .. عشان الحلاو والبرد

وساعات آخذها ومعانا الشغالة ونمشي ليي الفرع إلي يم البيت عشان أكسر روتين اليوم زحمة وسيارات

وآخر شي .. نهاية الإسبوع الزوارة

ومع هذا أقول في ... ملل

فكرت .. وفكرت

الملل له أسباب وأشكال .. وايدة

في ناس تمل من ستايلها وتلجأ للنيو لوك

في ناس تغير مجال عملها من فترة لفترة

في ناس يملون من قلب .. ويغيرون مسار حياتهم ككل

في ناس تسافر بين فترات قصيرة .. لسبب الملل من شئ معين بالحياة آنا أعتبرهالشئ مجهول ولا يمكن تفسيره يقدر الإنسان يعبر عنه لكن ليس بالضرورة هو الحقيقة الداخلية

ودفعتهم الرغبة للتغيير وهالفكرة ليست معممة

وفي ناس .. مسألة الملل عندهم اكتفاء من شئ معين

أعطيكم مثال

في رجل أعمال .. اتجه مؤخرا للسياسة .. تهقون ليش؟

هل السياسة ممتعة؟

هل السياسة مثيرة .. بمعنى مجال متجدد؟

لأ .. لكن السبب هو

إنه اكتفى من ناحية المال .. لذلك اتجه للسياسة

في ناس تمل بشكل سريع وآنا وحدة منهم

أحب التجدد في كل شئ

والتغيير حتى لو بشئ بسيط

الملل له أسباب أحيانا الواحد .. مايقدر يوصلها

حتى الشباب والبنات .. إلي نشوفهم بالسوق أو أي مكان بصرعات وموضات حديثة وغريبة بعض الشئ

آنا برأيي .. ملل من الفراغ الداخلي في أنفسهم

إذا الحياة مشت على وتيرة وحدة .. معناته الجمود والرتابة مثل الطبخة إلي من غير ملح

ليس لها طعم

سهل التجديد .. لكن السؤال الأهم بماذا نجدد؟

تحت ضغوطات وقوانين الحياة .. إلي تفرض عالشخص فرض واحد

أترك لكم حرية اختيار نوع التجديد

على فكرة الصورة إلي فوق .. من رسومات

الفنان الرسام الإيراني / أيمن مالكي

جدا تعجبني رسوماته .. كأنها حقيقية وليست رسم

ولا تنسون ممنوع الملل .. وأهلا بالتجديد

الخيل

أحب الخيل بشكل رهيب .. يكاد يكون صديقي المقرب لي .. سبحان الخالق لما أطالع ويهه كل شي فيه معبر

وبالأخص عيونه .. كأنها تتكلم من غير مترجم .. لأنها معبرة بكل معنى الكلمة

لذلك حبيت أنقل هذه اللحظات من خلال الخيل

ودي أبعد شوي عن التزامات وأجواء الحياة ... بعييييييييييييييد حيل بعيييييييييييييييد

أبي أنطلق .. وأفج القيود .. وأنطلق .. وأنطلق .. إلى ماله حدود


هم بعد أبي أنطلق .. أبي كل قطعة فيني .. تستمتع بالهوا ... أبي هوا حياتي آنا




أبي أقعد بروحي .. مع نفسي .. من زماااااان وآنا ناسيتها
أبي أستشعر نفسي ... مع نفسي
أبي أستجمع كل قوتي .. وأجدد طاقتي




عشان بالآخر أقدر أرجع .. مع نفسي بدون قيد .. بدون اختناق .. بعيون فيها بريق الحياة
وابتسامة من الأعماق