مدارسي حبيباتي

روضة القدس

مدرسة سمية الإبتدائية

مدرسة نسيبة بنت كعب المتوسطة

مدرسة ثانوية الروضة بنات

أحلى تحية وأكبر حب للمدارس إلي درست فيهم وأبلاتي إلي ما غابوا عن ذاكرتي وكل صديقات الدراسة بكل المراحل ولا أنسى سنة الدمج بعد الغزو الكريه .. سنة الكروتة والتحذف إلي ماله والي .. والركض بالمناهج.. بس كانت ظريفة بسرعة مشت المهم مع مرور الوقت اختلفت المدارس والطلبة والطالبات .. اختلاف ملحوظ .. قمت أستغرب حيل من إلي أسمعه وأشوفه .. إن جان من المعلمين أو من الطلبة كلا الجنسين

قبل الأبلات كانت لهم هيبة .. كنا نخاف منهم ونحبهم بنفس الوقت وآنا عن نفسي وبرأيي الخاص كنت أحب الأبلات الكويتيات أكثر من الوافدات (كل الإحترام لهم بالآخر هم علموني واستفدت منهم .. من علمني حرفا .. صرت له عبدا) المهم كنت أحب حصة الأبلة الكويتية .. تدرس من قلب وكان لها حرص عجيب على وصول المادة لأذهان الطالبات وخصوصا أبلات الإنجليزي .. تصدقون مانسيت أبلة كل مرحلة علمتني مبادئ اللغة الإنجليزية الصحيحة بالنطق والكتابة .. والكل متفق .. على إنه في أساس صح .. إذا مابعده صحيح ... ذاكرة أشكالهم وأصواتهم ونصايحهم .. حتى طريقة تشجيعهم لنا .. كانوا رائعين

اختلفت الأمور بهالوقت .. ماني عارفة شالسبب بالضبط قمت ألاحظ تسريحات الشعر .. تطويل الأظافر والصبغ .. والله قبل نخاف من يوم السبت لأنه في تفتيش بالطابور على طول الأظافر وإلي موقاصتهم تضطر قبل جرس الطابور بسرعة بسرعة تقصهم بالمقص (أذكر المقص مال حصة الرسم حق القص واللزق) وماكان فيه تسريحات ولا موبايلات ولا صوت عالي ومرادد .. يالله طرق الشباصة البيضا الصغيرة والفركيتة الستيل .. وإن هاوشونا انجعمنا وسكتنا .. كل هذا تغير ... ليييييش؟؟

هل الجيل الحالي مختلف ؟ وإلا طريقة التدريس فيها خلل؟ وإلا شئ راجع للتربية بالبيت وبين الأسرة؟

مدارس الطلبة البنين .. اسمع من بعض الأقارب عن الهوشات إلي تصير بوسط الساحات وبالهدة سجاجين ..وآلات حادة .. ولاننسى تبادل مقاطع البلوتوث البايخة بينهم .. السؤال إحنا موقادرين على طلبتنا ؟ وإلا المدرس ما له هيبة!! .. قبل الأبلة بس تقول مابي أسمع ولا نفس .. والله عقب هالكلمتين إلي يقط إبرة بأرض الصف يسمع صوتها من الخوف نسكت.. بس مادري شلي صار ألحين؟؟

قبل القولة مالت المريول عادية ويا ويلها يا سواد ليلها الطالبة إلي إتيي بموديل .. ألحين يالله خير الموديلات والأشكال والعفسة والدنيا

إنيي حق مدرسات هالوقت آنا ما قول كلهم لكن البعض .. للأسف تستخدم مكان عملها بما إن كله نساء وكما هو معروف إن النساء هن الشريحة الأكبر بالشراء .. فالأبلة صاحبة البياعة تنتهزها فرصة لترويج بضاعتها إلي يايبتها من تايلاند أو الصين

وإلا طلبات صواني الحلو والفطاير .. الأبلة ماهرة بالطباخ .. فتسوق طبخ ايدها .. شصير إن زادت مدخولها بهالطريقة !!! ياسلاااااام

وظاهرة ضرب الطلبة .. جنه جنه .. هقوتي إنهم منعوا ضرب الطالب بس اذن من طين واذن من عجين

هذا كله يهون أمام هول ما سمعته ... شئ بالخيال .. تصورا بعض المدرسات يحاولون يتقربون من الطالبات ويسإلونهم عن مشاكل بيوتهم وتشوف وين المساوئ في الحياة الزوجية بين أمها وأبوها ... حق شنو بتوصل ..مادري؟؟ بس فعلا إن كيدهن عظيم

بالآخر ما أقول الكل لكن البعض .. ويظل في مدرسين ومدرسات مربيات فاضلات وتخرجوا على إيدهم ناس من أحسن مايكون سواء التعليم الدراسي أو في الحياة .. لأني أعتبر المدرسة مصدر تعليم علمي واجتماعي بنفس الوقت