تستاهل .. أم سوزان

بصراحة تستاهل التكريم على المسلسل الجميل "الفرية" قصة .. حوار .. أداء كله كان رائع

آنا أعتبر حياة الفهد .. ويمكن البعض يشاركني الراي

إنها تمثل الأم في كل بيت في الكويت

شخصيتها .. كلامها .. تعبيرات وجهها .. ضحكتها .. نبرة صوتها .. مثال للأم الكويتية الحنون إلي دايما تتفانى من أجل عيالها وبيتها

أذكر أمي كانت مسافرة في إحدى الرمضانات السابقة

كنت آنا والوالد واخواني الصغار بالبيت .. آل يعني بطبخ لهم

أبوي ما كان عنده أي اعتراض على طبخي .. بس النزق التوأم ما كانوا يسكتون من التعليقات

طبعا كانوا يطفروني محاولات .. عشان نلهي نفسنا عن غياب الغالية أمي

لا .. بس عدت .. الحمدلله بيضتها

المهم كان ينعرض لحياة الفهد مسلسل قبل الفطور مباشرة ... من المقدمة ليه النهاية وآنا مجابلته

أو ساعات أطلع من المطبخ وبإيدي الملاس .. وإلا سجينة السلطة

وأوقف عند باب الصالة وأجابل المسلسل

وعشان أخاف لا الطبخة تحترق .. تشوفوني مابين الصالة والمطبخ

وأيضا أشوف الإعادة .. لأني كنت أشوف فيها أمي

بهيئتها

بحركاتها

بكلامها

بتلقائيتها

ولما تبجي ... لا شعوريا تدمع عيوني

قشمرتها .. وخفة دمها .. لطيفة عالقلب

وايد أحب حياة الفهد

هي متواجدة في كل بيت

وفي كل شخصية أم كويتية

حياة الفهد .. لازالت في القمة

أتمنالها كل التوفيق والنجاح ومنها للأعلى انشالله

وتستاهلين كل خير يا أم سوزان

يالله نفرفش

كثيرة هي الصدمات .. وكثيرة هي العثرات بالحياة

نظرا للحالة المزاجية الراهنة

والصدمة القوية .. وآثارها

ف أبي أطلع من هالمود وأساسا مو عوايدي .. آنا أحب الفرفشة والإنبساط

فحبيت أفرفش معاكم

وأبي رايكم .. أي صورة تعبر عن الواقع

هااااااااااتشو

حدث ولا حرج

ما أطيق ريحة الزقاير على بعد أمياااااااااال ماواطنها بعيشة الله مادري المدخنين شلون متحملينها

ليش عاد؟؟؟

معقولة تكون هذي الحالة بعد الزواج؟

سحر بحر بوداوود

ياختي عليها .. يا ختي عليها

تغيرات الزمن

انشالله تكونون استمتعتوا

ترهمون لي

زهيرية من زهيريات

الشاعر المبدع / عبدالرحمن الضويحي

انتم ترهمون لي

انتم ترهمون لي وآنا لكم مرهم

أرهم مع إللي لجرحي بلسم ومرهم

وأرهم مع إللي يتشره ليش ما مرهم

وأرهم مع من فقدنا ساعة مرنا

وأرهم مع اللي يشارك حلونا ومرنا

وأرهم مع الإبتسامة وكلمته مرنا

ولا مني مريت يعاتبني بعد مر هم

إجازة سعيدة

صراحة ... اليوم

مشكلة إذا الملل تسلل للحياة

ليش الواحد يمل؟؟

ليش الملل أصبح ياخذ جزء كبير من حياتنا

في أيام الإنسان يحس بملل فظيع .. مع انه لله الحمد كل شي موجود

لكن يظل في ملل داخل النفوس

وهالمشكلة عند كل واحد فينا

ساعات نوصل لنقطة نقول فيها أووووه مليت .. أو .. أوووه زهقت

وغيره .. وغيره .. أصلا ساعات الواحد ينجك بسرعة من ويهه يبين إن مال من شئ

الملل أصبح جزء من الأيام

الحياة عندي .. مرتبة حسب الأنشطة إلي أحب أمارسها بعد الدوام

يعني .. مخصصة وقت لإهتمامي الأول وهدفي

مخصصة وقت لهوايتي .. الرسم

مخصصة وقت للصديقات والطلعة معاهم

وخلال هذي الأوقات مداعبات .. عيال خواني وخصوصا ثريا الصغيرونة

وخط السير المفتوح للجمعية .. عشان الحلاو والبرد

وساعات آخذها ومعانا الشغالة ونمشي ليي الفرع إلي يم البيت عشان أكسر روتين اليوم زحمة وسيارات

وآخر شي .. نهاية الإسبوع الزوارة

ومع هذا أقول في ... ملل

فكرت .. وفكرت

الملل له أسباب وأشكال .. وايدة

في ناس تمل من ستايلها وتلجأ للنيو لوك

في ناس تغير مجال عملها من فترة لفترة

في ناس يملون من قلب .. ويغيرون مسار حياتهم ككل

في ناس تسافر بين فترات قصيرة .. لسبب الملل من شئ معين بالحياة آنا أعتبرهالشئ مجهول ولا يمكن تفسيره يقدر الإنسان يعبر عنه لكن ليس بالضرورة هو الحقيقة الداخلية

ودفعتهم الرغبة للتغيير وهالفكرة ليست معممة

وفي ناس .. مسألة الملل عندهم اكتفاء من شئ معين

أعطيكم مثال

في رجل أعمال .. اتجه مؤخرا للسياسة .. تهقون ليش؟

هل السياسة ممتعة؟

هل السياسة مثيرة .. بمعنى مجال متجدد؟

لأ .. لكن السبب هو

إنه اكتفى من ناحية المال .. لذلك اتجه للسياسة

في ناس تمل بشكل سريع وآنا وحدة منهم

أحب التجدد في كل شئ

والتغيير حتى لو بشئ بسيط

الملل له أسباب أحيانا الواحد .. مايقدر يوصلها

حتى الشباب والبنات .. إلي نشوفهم بالسوق أو أي مكان بصرعات وموضات حديثة وغريبة بعض الشئ

آنا برأيي .. ملل من الفراغ الداخلي في أنفسهم

إذا الحياة مشت على وتيرة وحدة .. معناته الجمود والرتابة مثل الطبخة إلي من غير ملح

ليس لها طعم

سهل التجديد .. لكن السؤال الأهم بماذا نجدد؟

تحت ضغوطات وقوانين الحياة .. إلي تفرض عالشخص فرض واحد

أترك لكم حرية اختيار نوع التجديد

على فكرة الصورة إلي فوق .. من رسومات

الفنان الرسام الإيراني / أيمن مالكي

جدا تعجبني رسوماته .. كأنها حقيقية وليست رسم

ولا تنسون ممنوع الملل .. وأهلا بالتجديد

الخيل

أحب الخيل بشكل رهيب .. يكاد يكون صديقي المقرب لي .. سبحان الخالق لما أطالع ويهه كل شي فيه معبر

وبالأخص عيونه .. كأنها تتكلم من غير مترجم .. لأنها معبرة بكل معنى الكلمة

لذلك حبيت أنقل هذه اللحظات من خلال الخيل

ودي أبعد شوي عن التزامات وأجواء الحياة ... بعييييييييييييييد حيل بعيييييييييييييييد

أبي أنطلق .. وأفج القيود .. وأنطلق .. وأنطلق .. إلى ماله حدود


هم بعد أبي أنطلق .. أبي كل قطعة فيني .. تستمتع بالهوا ... أبي هوا حياتي آنا




أبي أقعد بروحي .. مع نفسي .. من زماااااان وآنا ناسيتها
أبي أستشعر نفسي ... مع نفسي
أبي أستجمع كل قوتي .. وأجدد طاقتي




عشان بالآخر أقدر أرجع .. مع نفسي بدون قيد .. بدون اختناق .. بعيون فيها بريق الحياة
وابتسامة من الأعماق

بسأل؟؟؟؟

بسأل؟؟؟؟؟

منو يحتاج الثاني أكثر؟؟؟

بمعنى .. هل الرجل يحتاج المرأة أكثر من احتياج المرأة للرجل؟

أم

المرأة تحتاج الرجل أكثر من حاجة الرجل للمرأة؟

في جميع نواحي الحياة

الكل متفق على أنه .. الأثنين محتاجين بعض لكن هل بنسب متفاوتة أم متساوين؟

وليش؟؟؟

مواقف منوعة

خلال الإسبوعين الماضيين مرت علي بعض المواقف الطريفة .. وبعضها للأصدقاء .. بعد الإستئذان منهم حبيت أذكرها لكم

موقف 1

نهاية الإسبوع إلي طاف صديقتي طلعت قبلي من الدوام

وصار لها جم يوم تحن علي تبي تروح فيلم نوربيت لإيدي ميرفي

وآنا بصراحة .. أستمتع بأفلامه

المهم .. دقت وقالتلي آنا بسينما شرق حجزت .. لفيلم نوربيت .. اليوم

قلتها: زين تسوين نغير .. شوي الأجواء

آنا طبعا راحت علي نومة

دقت: وينج .. باقي ساعة عالفيلم .. إحنا متفقين نتغدى وندش الفيلم

ودار حديث .. ليش متأخرة .. آخر شي قالت

إذا تأخرتي وين أحط لج التذكرة؟

قلت لها: حطيها عند الهنيدي

آنا قلت هالكلمتين .. ماتت من الضحك البنية كااااااااااااع كااااااااااااع كااع

قلت: منى شفيج .. ينيتي؟

جان تقول: عليج مصطلحات ... شنو هنيدي

قلت: الهندي إلي عند باب السينما

قالت: الكرف اليوم .. مأثر عليج

أصلا إنتي من غير شي .. مافي مصطلح ما تقلبينه

البيتزا تسمينها بزازة

اللاند مارك تسمينه أرض العلامة

المجسم مال العمرانية إلي عالبحر تسمينه العمة ربيانة

إيكيا تسمينه .. عيكيا

الفاكس تسمينه ... فكوس ... شدة عالكاف

الهندي .. صار هنيدي؟

قلتلها: عااادي عيشي حياتج

وماسكتت من الضحك... المهم رحت السينما ولقيتها المسكينة ناطرتني .. سألتها ليش ناطرة

قالت: بشوفج .. أي هنيدي بتسإلين

موقف 2

آنا بطبعي .. إذا أمي علقت على أي شي عندي .. ونبهتني عليه .. أتركه على طول .. بدون نقاش

هذاك اليوم كنت سهرانة .. وقعدت الصبح متأخر.. وعادتي أكون مجهزة الملابس من الليل

الصبح .. مايه مزاجي مع البدلة إلي كنت مختارتها .. واخترت وحدة ثانية أمي ما تحبها

اضطريت .. لسبب إنها مكوية وجاهزة .. فعالسريع .. عشان ما أتأخر

المهم .. بطلعتي أمي ماشافتني .. لأنه مبجر .. وأنا أول وحدة تبطل باب الصالة

بردتي .. سمعت صوت أمي بالصالة .. قلت ماني داشة من هالصوب.. خنا أدش من المطبخ أحسن

على ما وصلت المطبخ .. دشيت وإلا أمي بويهي

جان أقول ... حبيييييييبتي أمي قوة .... ومعاها بوسة عالراس

جان تقوللي: لا تساحليني .. (ومع تعبيرات ويهي) أقولها عفية عفية عفية خلاص آخر مرة

جان تبطها ضحكة .. وتقوللي: مقلمة وايد .. لا تلبسين مقلم

أمي ماتحب المقلم .. تقول مو حق البنات

فديتها

موقف 3

من يومين رحت مركز تجهيز الصالونات عندهم خلطات للشعر منعشة

وطبعا في هالمحلات بواريك وبوستيجات

ثاني محل دشيتله .. كبير .. سمعت صوت ضحك بالزاوية .. وصوت مسموع

يوم أقرب لستاند الخلطات .. وإلا ريال لابس باروكة وزوجته مو متمالكة نفسها

من الضحك (وطبعا آنا مادري إذا حركة .. وإلا صج معزم يشتري باروكة) بس كان موقف .. عجيب

وأحلى شي المدام تقوله .. لحظة .. لحظة ..لا تشيلها .. خنصورك

موقف 4

أختم بموقف سعيد ولأنه في هذا اليوم بالتحديد في مناسبة سعيدة

من فترة في الدوام طلعت اشاعة إنه إحدى الموظفين ملج على إحدى زميلات العمل

والكل لامهم .. ليش ما تقولون؟ .. ليش ما تتحجون؟ ليش خاشين عنا؟

المهم .. الطرفين مالهم علم بذلك ... وكل واحد منهم .. عاتب الثاني شلون يصير تطلع هالإشاعة

وصار خلاف

إهي عصبت وأهو عصب .. لأنه الموقف صعب

لكن سبحان الله .. كأنه هالإشاعة خيرة للأثنين

صار فيه تقارب

وبالفعل .. تم الزواج .. وأصبح حقيقة مو إشاعة

وانشالله اليوم عرسهم

ادعولهم بالتوفيق

أسأل الله التوفيق للجميع

إجازة سعيدة

عين جمرا .. أقصد حارة

ديري بالج مو تقولين ... ريلج وين يشتغل ! وإلا شنو تجارته

لا تتكلمين ... وتقولين جم معاشج

حطي .. بالج .. لا تنبهينهم عن حب ريلج لج

دايما قولي.... بيننا مشاكل ... ومافي توافق .. ومومتفاهمين

لمي شعرج بالعروس.... سوي تسريحة تلمه .. لا تفلينه جدام الناس

سيارتج اليديدة .. صفطيها بعيد عن مكان الدوام .. عشان لا أحد يشوف عندج سيارة يديدة

لا تضحكين وايد وتبينين إنج سعيدة بالحياة

لا تقوليلهم شنو عندج .. شنو يبتي ... وين سافرتي .. ..مع ريلج وإلا أهلج ..إش شريتي يديد

لا تفطنين الناس عن اهتمام ريلج فيج

مو تقولين ريلج يابلج .. وحطلج .. قولي شريته من السوق

لا تلبسين ذهب وايد .. ألحين يقولون عندها همجة فلوس ... حتى عظامها ذهب

لا تقولين شريتوا بيت .. نطري بعد ما تأثثون وتخلصون .. يالله تقولين .. والله يفكج من عيونهم

مو تصبغين أظافر بنيتج الصغيرة .. ترى عيون الناس ما ترحم

هذا ما يدور في مجالس النساء وإلي أسمعه منهم ولا علم لي بأحاديث الرجال عن هذا الموضوع

والأساس التحذير من العين الحارة .. مع وجودها

يا ربي .. يعني الواحد شسوي .. ما يكشخ! .. ما يلبس! .. ما يطلع! .. والسبب الخوف من العين

إنزين .. أوكي ... لابد من الحذر

بس آنا أبي أعيش حياتي .. وأستمتع فيها .. وبكل مراحلها

ليش أحرم نفسي! ... بس عشان عيون الناس

وإذا كان عندي أخبار سعيدة .. ليش ما أبشر الناس؟

الرسول عليه الصلاة والسلام قال: بشروا ولا تنفروا

وشي ثاني ..أحب .. الناس تشاركني فرحتي

لكن دائما يتم تحذيرنا من العين

آنا عارفة إن العين .. حق

وفي ناس ماشالله عليهم .. عيونهم حارة نار

والحسد موجود في كل مكان

لكن .. أبي يوم أتكلم فيه بدون ما أخفي بعض الأمور

أبي .. ألبس على راحتي

أبي .. أتصرف على سجيتي

أبي اللحظة .. إلي أعيشها بفرح .. الكل يشاركني فيها من الأول

طبعا هذا شئ محظور بالنسبة للخصوصيات الدقيقة في حياتي

إلي أقصده الفرحات العامة .. وإلي تحصل حق أي انسان عالأرض

ليش ... لازم في قيود؟

ليش .. نحذر بالفصح عن أي فرحة .. أو شغلة تونس؟

ليش ننطر .. يمر الوقت وبعدين نتكلم؟

يا ربي ... رهيب الحسد وإلي عيونهم حارة .. الله يكافينه الشر

للأسف صار حتى بين الأقارب

القريب ... يحسد ... قبل ... البعيد

الله يكافينه ويكافي الجميع الشر

الغيرة

كثير الكلام عن مفهوم

الغيرة وكل شخص منا له

مفهومه

أنقل لكم أجمل قرءاتي عن الغيرة

عندما تغار المرأة ... تبكي

وعندما يغار الرجل ... يصمت

عندما تغار المرأة ... تكره الرجل

وعندما يغار الرجل ... يكره نفسه

أحيانا

يغار الرجل على إمرأة تحبه ... حتى لو لم يكن يحبها

وتغار المرأة على رجل يحبها حتى لو لم تكن تحبه

أجمل أنواع الغيرة

غيرة الحب

وأسوأ أنواع الغيرة

غيرة الحقد

من بوادر الغيرة

اشتعال المرأة

انطفاء الرجل

تسعد المرأة ... بغيرة الرجل الذي تحبه

وتختنق ... بغيرة الرجل الذي يحبها ... ولا تحبه

نحن

نغار على الذين نحبهم .... لأننا نحبهم

ونغار على الذين ... يحبوننا .... لأننا نحب أنفسنا

لا تعبر عن حبك لهم

بالغيرة

إذا كنت غير متأكد

من احساسهم تجاهك

فقد تكشف لحظات ضعفك

لمن لا يستحق

ما أكبر الفرق بين الحب ... والغيرة

فالحب الكبير يولد الغيرة

والغيرة الشديدة تقتل الحب

وما أعظم الفرق

بين الغيرة والشك

ومعظم حالات الغيرة في القصص العاطفية

يكون مصدرها ... الشك

إذا ضبطت نفسك متلبسا

بالغيرة "على" إنسان ما

فتفقد أحاسيسك ... جيدا

فقد تكون في حالة ..... حب

وأنت لا تعلم

وإذا ضبطت نفسك متلبسا

بالغيرة "من" انسان ما

فطهر أحاسيسك ... جيدا

فقد تكون في حالة إثم

وأنت تعلم

تعتقدون ليش؟؟؟

مع ازدياد معدل المعاكسات في المجمعات .. في الجمعيات .. في المطاعم .. في كل الأماكن العامة

وزادت معاها الجرأة وتعدي الحدود بالضرب ... والترفس .. والكلام الخارج عن الذوق العام

تعتقدون شنو سبب المعاكسات؟

هل أهو .... فراغ؟

هل أهو .... تسلية وتضيع وقت؟

هل أهو ....راجع للتربية وفوضى داخل نفوس هالناس؟

هل أهو تداخل أساليب الحياة المتطورة وامكانية تعدي الخطوط الحمراء باستخدامها؟

مبالغة الإعلام والفضائيات الكثيرة إلي من غير رقابة؟

هل إهي الموضى والبهرجة؟

ومن هو المتسبب بذلك؟

هل اهو من الفتاة .. أم الصبي؟ .. أم الأثنين معا؟

وعلى من يلقى اللوم؟

وليش؟

وباعتقادك الأمر راح يزيد مع الأيام ومع توالي الأجيال؟

هل راح نوصل ليوم يكون فيه رادع حقيقي لهذه الأمور؟

أبي رايكم بصراحة

عاطفة حواء

ربما سؤال يراودك ماسبب خلق حواء من ضلع آدم وهو نائم؟؟

وما سبب خلقها من ضلع أعوج؟؟

كما هو معروف أن آدم هو أول بشري وجد

كان آدم يسكن الجنة .. وبالرغم من كل ما هو موجود هناك ... استوحش

فحين نام خلق الله حواء من ضلعه .. يا ترى ما السبب ؟؟

لماذا خلقت حواء من آدم وهو نائم؟ لماذا لم يخلقها الله من آدم وهو مستيقظ ؟؟

إليكم الســـــــــــــــــــــــــــــــــبب

يقال أن الرجل حين يتألم لا يحب .. بعكس المرأة حين تتألم تزداد عاطفة وحب

فلو خلقت من آدم عليه السلام وهو مستيقظ لشعر بألم خروجها من ضلعه وكرهها

لكنها خلقت منه وهو نائم .. حتى لا يشعر بالألم فلا يكرهها

بينما المرأة تلد وهي مستيقظة .. وترى الموت أمامها ... لكنها تزداد عاطفة

وتحب مولودها ... بل تفديه بحياتها

لنعد لآدم وحواء

خلقت حواء من ضلع أعوج من ذاك الضلع الذي يحمي القلب

أتعلمون ما السبب !!؟؟

لأن الله خلقها لتحمي القلب ... هذه مهنة حواء

حماية القلوب

فخلقت من المكان الذي ستتعامل معه

بينما آدم خلق من تراب لأنه سيتعامل مع الأرض

سيكون مزارع .. بناءا .. حداد .. نجار

لكن المرأة ستتعامل مع العاطفة ... مع القلب

ستكون أما حنونا .. وأخت رحيما .. وبنتا عطوفا ... وزوجة وفية

خرجنا عن سياق قصتنا

لنعــــــــــــــــــــــــــــــــــد

الضلع الذي خلقت منه حواء .. أعوج

يثبت الطب الحديث أن لولا ذلك الضلع لكانت أخف ضربة على القلب سببت نزيفا

فخلق الله ذلك الضلع ليحمي القلب

ثم جعله أعوجا ليحمي القلب من الجهة الثانية

فلو لم يكن أعوجا لكانت أهون ضربة أدت إلى الموت الحتمي

لذا على حواء أن تفخر بنفسها كونها خلقت من ضلع أعوج

فهي خلقت هكذا

وانت يا آدم تحتاج إليها هكذا

فروعتها بعاطفتها

تناقض

ساعات وآنا قاعدة بغرفتي أطالع التلفزيون وبالذات قناتي المفضلة الـ موفي جانل عندهم أفلام روعة تناسب ذوقي وخصوصا الرومانتيك إلي إهي أفلامي العزيزة

أحيانا وآنا مجابلته أسرح بعيييييييد بأمور طبيعية وبأمور خيالية

ومن ضمنها موضوع تناقض بعض الصفات عندي، أستعرضها لكم وحدة وحدة

خجولة وأستحي وايد .. وبنفس الوقت جريـــــــئة

موصوفة بالهدوء .. لكني معروفة بإني قوية الحجة

ما أحب الهذرة والكلام الزايد .. لكن بشهادة الآخرين شخصيتي قوية وصاحبة رأي

أحب بقوة وبكل مافيني وأعطي من قلب .... إلا إني ما أحب أخوض هالأمور يمكن لأسباب (-) معينة

قلبي حنون وعطوف لأبعد الحدود .. لكن أحيانا أقسو على نفسي

كثيرة التأمل ... وبالجهة الثانية أحب الوناسة والحركة والإنطلاق

أسعى عشان غيري .. وبالمقابل ما أسوي شي حق نفسي ولا أفكر فيها أبدا

أحب أشوف أفكاري وآرائي يستخدمها غيري .. لكن ما أحب أبوح فيها لأحد

صبورة جدا وعالأمور الصعبة بالذات .. لكن الأشياء الصغيرة ما أصبر عليها .. مادري ليش

أتحكم في مشاعري ... لكن في أحيان كثيرة لا أملك دمعتي

عندي عزة نفس عالية جدا... لكن عند من أحب أكون شخص آخر

اجتماعية وأعشق الإختلاط بالناس ... لكني أميل للعزلة أحيانا .. يمكن أمر طبيعي بسبب تغير ظروف الحياة

هذي آنا ... وأحب أكون آنا .. لأني إذا ما كنت آنا ما راح أكون شخص آخر ولا أحب أكون شخص آخر

أرجو إنكم ما تجاملوني ... وتعطوني رايكم بصراحة

بصراحة

بصراحة أبي أمتن ...إيه أبي أمتن

عيزت ماخليت طبيب .. ما خليت طب شعبي.. ما خليت حواي .. ما خليت فاتح شهية

ماخليت رياضة .. قالولي في رياضة تمتن .. وسويتها وماكو فايدة

ما خليت أدوية .. ما خليت وجبات دسمة وعيوش .. ما خليت حلو

حتى بالدوام لا يمكن يخلو درجي من أنواع مختلفة من الكاكاوات .. ماخليييييييييت شي يعتب علي

قالولي شيبس الماكدونالدز يمتن.. جان أطيح له شيبس الماكدونالدز

قالولي إكلي أكل الهنود جباتي .. وسمبوسة .. وبطاطهم الحار

آنا طبعا ما قصرت .. كل يوم عالريج .. بس هم ماكو فايدة

نصحوني بالرهش .. وأهم مايدرون إن من زمان وآنا صحبة حميمة مع الرهش .. لكن مافي فايدة

خواتي يقولولي أحسن لج خلج جذيه .. وآنا اذن من طين .. وإذن من عجين

إنزين وبعدين وتاليتها معاي .... أبي امتن شالدبرة

إن رحت عرس .. قالولي يا بختج الموديلات إتيي عليج بدون مشاكل

بالعيد .. قالوا يا حظج تلقين مقاسج

مايدرون شنو بقلبي

يوم الزوارة .. قالوا إنتي الوحيدة إلي مرتاحة لا تحاتين لا رجيم ولا هم يحزنون

بطلعات الغديات والعشيات .. مع الصديقات .. على كثر ما آكل .. يقولون لي .. إنتي وين تودين هالأكل .. ما تمتنين

أم صديقة العمر .. لازم كل أربعاء أشوفها عند الخضرة مالت الجمعية وتعطيني التعليق المعتاد وإلي حفظته عن غيب

هوهوهو .. يا حافظ شفيج يا ألماس .. كل مالج وتضعفين ليش .. (-) هذي إنتي ما تغيرتي من أيام المدرسة

يا ربي شسوي .. أبي أمتن

يعني ليش آنا ألبس مقاس رقم عشرة وأيام الإحباط مقاس ثمانية إلي أهو اكس سمول

لما أدخل محل تطيح عيني عالمقاسات الأكبر بشوي لأني أقول مو معقول الأصغر يكون مقاسي

لكن راعية المحل تقولي: إنتي مالازم تاخدي هالأد .. السمول بيجي مزبوط .. عاد آنا أحتر من داخلي

وإن أخذت قطعة من السوق باختلاف معايير السمول لكل موديل..لاااااااااازم يتبعها مشوار للخياط للتضييج والذي منه

لبسي صار كله جينزات .. لأنه أهو الوحيد إلي يضبط وشكله مرتب .. بس أبي أغير ملييييييييييييت

مديرتي بالدوام تقوللي: آنا أخاف أكلمج .. أخاف تنكسرين

وزميلتي بالدوام مرة قالتلي: أنا بخاف عليكي من الورقة يا ألماس

سألتها ليش؟؟؟

جان تقول: خايفة تجرحج .. اتخني شوية يا بنت

في احد المرات وإلي أعتبره موقف طريف أحد العملاء إلي تعودنا عليهم .. في يوم احتاج يخلص معاملته يصعد فيها للدور الأول .. أنادي البورترية مافي رد (حزتها يتسلطون اختفوا كلهم) المهم قلت له استريح أخوي أطلعها لك أوقعها ما تاخذ وقت دقايق .. جان يقول لالالالالا .. لا يا اختي آنا أطلعها بنفسي أخاف ما تعبرين تصعدين

ومن صجه أخذها وصعد بأوراقه

يا ربي ليش ... الضعف مشكلة .. اللهم لا اعتراض

كل إلي يعرفني أهل .. وإلا صديقات .. وإلا معارف لازم يقوللي هالجملة

واااااي ألماس .. متني شوية .. يبيلج متن

ومن يومين لبست التريننج سوت وجهزت نفسي بأطلع أمشي عالبحر

أمي: يالله ارزقنا .. على وين يا ألماس

قلتلها بأمشي عالبحر

جان تقولي: من متنج! .. تبين تختفين بالمرة

آآآآآآآآآآآآآآآآآآآآآه من الضعف والتعصقل

الحمـــــــدلله علـــــى كـــــــل حــــــــــــــــال

ويـــــا رب .. عن خاطري ارزقنــــي متــــــن شويــــة

لحظات

أحلى شي بالدنيا إنك تحب وتحس بإلي تحبه وتتلمس حاجاته وتراعي شعوره

وتشتاق له إن غاب وتفرح وتستبشر إن حضر

قلب يحب بكل مافيه .. ويعطي من غير حدود

وهالقلب بحر حنــــــــــان .. لكنه عطشـــــان

تبتسم وترسم البسمة على وجهك وقلبك يبجي

تسولف ... وتضحك .. وتتفاعل .. لكن الروح بعيدة .. حيل بعيدة

أبي يوم فري .. أبي أركض .. أبي أنطلق .. أبي أنط .. أبي أطير ..أبي نفسي

أبي احساسي .. أبي وجودي

نبجي في هالدنيا .. نعاني .. ننحبط .. نتأثر.. نحبس في داخلنا .. إلى متى؟؟؟

قليلة هي لحظات الفرح ... كثيرة هي لحظات الحزن

سرحااااااااان

ليش الإنسان يسرح...؟ هل أهو هروب من الواقع ! .. وإلا حالة طبيعية وجزء من تكوين الإنسان! وإلا فعل جسدي لا إرادي تعود يقوم فيه الجسم من غير توقيت معين وتحت ظروف معينة! .. يمكن

فعلا سؤال يحتاج لإجابة واضحة

شنو حقيقة السرحان؟؟؟؟

بالسرحان الإنسان يروح بعيييييييييد عن الواقع والوقت والمكان إلي أهو فيه

نفكر بأمور تكاد تكون خيالية .. وأحيانا واقعية .. ويمكن أمور مستقبلية .. بس لاحظوا السرحان يختلف عن أحلام اليقظة

وعلى فكرة الطفل يسرح أيضا... بس عندي فضول .. بشنو يسرح الياهل؟؟

لما الإنسان يسرح .. يعيش بدنيا أحيانا يكون محتاجها... أحيانا يألفها .. أحيانا أمور يتمناها .. وأحيانا العكس تماما

بالسرحان تنولد أفكار

بالسرحان تنزل دموع

بالسرحان إتيي ذكريات من الأعماق

بالسرحان نعيش عالم ثاني موجودين فيه منذ الأزل

بالسرحان .. نلقى الحب

بالسرحان .. نلقى السلام

بالسرحان .. نلقى الأمان

بالسرحان .. نلقى الضحكة والإبتسامة

بالسرحان .. نلقى الأمل

بالسرحان .. نلقى الكره

بالسرحان .. نلقى الجروح

بالسرحان .. نلقى الآلام

بالسرحان .. نلقى الدمعة

بالسرحان .. نلقى الإحباط

السرحان فيه تناقضات عديدة

السرحان موعد مع وقت زمني مجهول

توقــــــف ... لا تســــــرح وتــــــروح ... بعــــــــيد

لا تسرحوووووون وايد .. وهالنصيحة أوجهها لنفسي أولا ... لأني كثيـــرة السرحان

حديث العيون

عيناك شمس حسنها يتألق منها ينابيع البراءة ترتوي

والحب من اشراقها يتدفق

نبض قلبي زورق أحلام عينيــــــك أشرعة بها الآمال في

الآفاق تخفق وبالحنان تورق

عيناك لن يغيب صباحها فكأنها في كل قلب تشرق

هي جنة خضراء فيها نلتقي وعلى ابتسامات الزهور ترقرق

والغصن يهوى والبلبل تعشق

منو فينا مايحب لغة العيون!.. العين هي مرآة النفس وجمال الوجه وأسرار القلب

إليكم حديث العيون وأسرارها واختلاف لغاتها بحسب اختلاف أشكالها ألوانها

العيون الواسعة الكبيرة تدل على الذكاء وحب الإستطلاع

العيون الصغيرة الضيقة تدل على حدة العاطفة والنشاط الموفور

العيون المستديرة تدل على الكسل وبطء الفهم والتسرع في الحكم على الأشياء

العيون المستطيلة تدل على الرقة وسعة الحيلة وهي تشبه في شكلها حبة اللوز

العيون السوداء يتميز صاحبها بكثرة التفكير العميق ورهافة الحس وحب التأمل والذكاء

العيون الخضراء تدل على أن صاحبها سريع الإنفعال، حاد المزاج، طيب القلب، سريع الرضا، لكنه متفائل، يحب المرح كثيرا

العيون الزرقاء تدل على أن صاحبها يبدو دائما في حالة من التأمل والتخيل ويبدو هادئا دائما

صاحب العيون العسلية أو الرمادية ذو شخصية قوية ومتزن في تصرفاته

فهل هناك أجمل أو أحلى وأمتع وأبلغ من حديث العيون أو الحديث عن العيون؟

ألا تدهشـــــــــك العيــــــــــــــون؟؟؟

لحظات .. وفاء

مناسبة عزيزة

بمناسبة يوم السبت .. يوم الغلقة العالمي حبيت أفرفش .. وأفرفشكم معاي

إليكم مجموعة كاريكاتيرات وصلتني من إحدى الصديقات عبر الإيميل

وااااك وااااك ... واااااك .. وااااك تعيش وتاخذ غيرها

صاحب بالين جذااااااااب

مســـــــــــــــــاواة شقاقـــــــــــــــــــــية

إلي يدورون عالرجيم .. هذا الرجيم السنع

وبالنسبــــــة للنــــــــوادي

إذا الربع كلهم سمر لا تركبون كلكم بسيارة وحدة علشان .. لا يصير فيكم مثل الشباب إلي تحت

كل شي جايز .... حتى بالدوامات جايز

وأيضا يحدث بالدوامات التالي: لا تفرح في تعديل مكتبك ... فقد تكون خسرت منصبك .. تقضبوا بكراسيكم عدل .. تقضبوا

وهذا بالطبع مقلب يـــــــــوم السبــــــــــــــــت

انشالله تكونــــــــــون استمتعتـــــــــــــوا