وبعدين مع الناس؟؟؟؟شلون يعني؟؟؟
إن عطيت ريج حلو .. كلوك
وإن دقرتهم وحقرتهم .. طلعوا فيك امية عذروب وعذروب
وإن تماشيت معاهم .. خالفت مبادئك وقيمك
أي نعم ارضاء الناس غاية لا تدرك
لكن في شي اسمه فن التعامل
ليش الناس صارت تمشي ورا المصلحة وبس
ليش الضحكة والسوالف يختبئ ورائها عشرات الأقنعة
البعض من الناس فنان باللف والدوران
والبعض الآخر مثل الحية .. جلد ناعم من برة .. ومن داخله سم قاتل
ليش؟؟؟؟
لهالدرجة متمسكين بالدنيا؟ لهالدرجة ناسين إن لكل شئ حد وأولها عمر الإنسان
دبجة بهالدنيا .. ويتراقعون مثل اماعين المطبخ ..ودياجة أم أحمد .. والحالة حالة
بس بالآخر شنو؟؟؟ أبي أعرف إلي بيوصلونله شنو؟؟؟
القصد .. ليش الناس ما تتصرف بحب .. وسلام .. ونفس حلوة
أدري الأمزجة مختلفة .. والتكوين الشخصي يختلف من انسان لأخر
بس احيانا .. أشعر بتعب بداخلي .. وأتساءل ليش؟؟؟؟
ليش لما الواحد يسوي الشي الزين .. ينقلب ضده؟
ليش لما الواحد يبدي بالمساعدة .. بالآخر ينوكل بلا ملح؟
ليش الواحد يعطي من قلب .. وبعدين ... يكون أول شخص خارج حدود الحياة؟
من بعد ما تنمد الإيد وينفتح القلب .. للأسف بس نلف ظهورنا إتييلنا طعنة جاسية
ليش .. وليش .. وليش
أحيانا أغوص في أحلامي وأوصل لمكان بعيد ..وأقول
الله لو الكل يحب الكل .. إلي أقصده إن الناس تحب لغيرها مثل ما تحب لنفسها وبالمطلق
بالشغل أحزاب .. وحفر .. وهذرة ولغوة .. واحد يتصيد عالثاني .. ونفاق إداري
وواحد بيصعد على ظهر الثاني
العلاقات الإجتماعية .. قايمة على المجاملات والسوالف الكشاخية وكل من يبي يكون بالصدارة
وواحد يحر الثاني بس باسلوب حضاري
الحياة العامة .. تململ ... تشكي .. حسد
الأصدقاء .. أحيان كثيرة إتي القرصة منهم .. عاد هالقرصة .. أكثر قرصة تعور .. إتيي بالقلب
البعض من الناس مثل الحبة بمقلة .. مايهداله بال ولا يرتاح إلا لما يعرف خصوصيات غيره .. يستغلها مادة للسوالف
يا شين هالنموذج .. الله يكافينا شره
والبعض الآخر يجيد وبمهارة التلون .. حسب الأجواء والظروف المحيطة .. ديروا بالكم هالنوع خطر
ساعات أتساءل .. هل ببيته ومع أقرب الناس له يتعامل بهذا الشكل .. أم هي من مستلزمات الصعود إلى القمة
من أجل الفليسات والقريشات .. أو عشان مركز مرموق .. أو تربط عصاعص .. في هذي الحالة كل شي وارد
ليش مافي شي من قلب؟
ليش ما يطلع الشي سواء كلمة أو تصرف من طبيعة الإنسان ومن صميم أعماقه؟
قلوبنا صارت حذرة جدا في تعاملاتنا .. امية حاجز وحاجز والسبب نجهل من أمامنا والخوف من المفاجآت والصدمات إلي اتيينا من الطرف الثاني .. حتى مع صفاء النية ننصدم
شحقه جذي
ياجماعة الخير آنا مو معترضة على تصرفات الغير ... لكن إلي أبيه المصداقية بالتعامل وعدم اللف والدوران والتحيلق والتميلق من أجل أسباب دنيونية زائلة
وأحلى شي بالدنيا إن الإنسان ينذكر بالخير
بس اللهاة والركضة فيها شغلت الناس عن أمور كثيرة
وبـــــــــس
على قولة شغالتنا: قلب مال آنا واجد أور
وبالآخر ما أقول إلا
مو كل من ظهر لك سنه .. ضحكلك
27 comments:
هلا والله بالمسك كله :) موضوعج ماله حل .. والرد عليه بيكون
ولا أبلين ;p
--
يعني ماراح نلقى حل وهالشي صار أمر مسلم فيه مثل مايقولون
بما إننا بشر إذاً لازم تشوفين هاللي تحجيتي عنه
--
بالنسبة للمناسبات .. مضطرين انوجب
1. صلة رحم
2. عشان مايقولون عنا قاطعين
3. طمعاً بإدخال السرور على قلوبهم :)
وبيتكلمون ســــواء وجبناهم والا لأ .. فليش مانطلع احنا اللي بالزينه وخلهم يقولون اللي يقولونه
يسطفلو ;)
--
فيه جملة عورت قلبي
الأصدقاء .. أحيان كثيرة إتي القرصة منهم .. عاد هالقرصة .. أكثر قرصة تعور .. إتيي بالقلب
ضربتي على الوتر الحساس :(
لأن الشي اللي اييني من الغرب مايهمني لأن يظلون غرب ومايعرفوني عدل ولا آنه اعرفهم عدل .. بس لما يصير هالشي من القراب :(
--
وارد اعيد لج ماراح نلقى حل إلا حق أنفسنا
عامليهم بأخلاقج مو بأخلاقهم
صدقيني بترتاحيـــــــن
^_^
لا تعليق
هذا واقعنا الي لازم نعايشه
ومافي حل حق هالسوالف هذي طبيعة البشرة
حب الذات غريزة
واتوقع سبب كل المشاكل ان الواحد يبدي نفسه على الغير
فتحصل كل هالسوالف
كلامج بالصميــم .. و يزاج الله خير و يعطيج العافية ..
من كثر هالتساؤلات ببالي و اللي ما لقيت لها حل للأسف .. صرت ما أبالي بردات الفعل .. و أي شي بيصير خل يصير .. الأهم إني أسوي الخير و أصير زينة مع الكل .. حتى مع اللي طعنني .. ولا أبين له إني مطعونة أو دريت بالطعنة .. عشان أكسر عينه .. و يتحسف بطريقة غير مباشرة ..
ما نقول إلا الله كريم ..
ترى الدنيامو حلوة تدرين ؟؟ ممــلة
:(
سلام
صراحه الي تابينا وايد صعب انا يصير لالا موصعب للأسف مستحيل أو مع هذا
دمتم بابتسامه :)
Thanks for you work and have a good weekend
relaax
عدل كلامج يا ريلاكس .. بس أحيانا الواحد ينقهر من الصدمات
ليش الواحد يتعامل بالإحسان .. وبعدين يعاملونه بالإساءة
شحقى؟؟؟
الطعنة من الأصدقاء صعبة
انشالله شورج وهداية الله
tresten
لو إنه الناس فكرت ببعضها ماصار الحال بهالشكل
بس الدنيا بهذه الصورة مرعبة
وبعد فترة من الزمن شلون بيكون الحال؟
للأسف صار لازم نمشي على خط الحذر وعلى الدوام
إلي أقصده متى نكون على طبيعتنا
ليش لازم الرتوش والزخارف بالحياة عشان أوصل للي أبيه
البساطة في التعامل أحسن شي
breeze
وياج .. الله يعافيج
آنا معاج في كسرة العين
لكن في صدمات .. الواحد مايقدر عليها لابد من المواجهة
شوفي آنا أقولج الدنيا حلوة وبعض الأحيان تصير مثل الطبخة إلي بلا ملح
وهذا كله يعتمد على الناس إلي نتأثر فيهم ويتأثرون فينا وأهم المسبب الأول للأحداث
إذا الحال يعتمد على الناس إلي محيطين فيني
وعلى فكرة فيه ناس كويسة حلوة عشرتهم .. المطلوب إنج تدورين عليهم
smilyeyes
ممكن إيه ممكن لأ
إيه إذا إحنا تعاملنا بنفس الشكل والطريقة
وممكن لأ لما على قولة ريلاكس نعامل الناس بأخلاقنا وليس بأخلاقهم
وشكرا عالزيارة الأولى
وبمزيد من التواصل
شكرا
David Santos
thank you
u too
thanks
مصداقيه
مصداقيه
مادري وين سامع هالكلمه
والله صدقتي
ما تشوفيني طاب خاطري
والحمد الله والشكر زايدة العقد
وكل ما إكبروا ادبروا
إذا المرء لا يرعاك إلا تكلفا ... فدعه ولا تكثر عليه التأسفا
ففي الناس أبدال وفي الترك راحة ... وفي القلب صبر للحبيب وإن جفا
فما كل من تهواه يهواك قلبه ... ولا كل من صافيته لك قد صفا
إذا لم يكن صفو الوداد طبيعة ... فلا خير في ود يجيء تكلفا
ولا خير في خل يخون خليله ... ويلقاه من بعد المودة بالجفا
وينكر عيشا قد تقادم عهده ... ويظهر سرا كان بالأمس قد خفا
سلام على الدنيا إذا لم يكن بها ... صديق صدوق صادق الوعد منصفا
وقلب مال آنا واااااجد
وااااااجد
أوور
:(
براك
فعلا هالكلمة انمحت من قاموس الحياة
للأسف
اسس التعامل قاعد تختلف باختلاف الزمن والتطور بالحياة
الله يعين
Almas :
آاااااه يا مسك إنتي تطلعتي كل إلي بقلبه وماني عارفه إشلون أقوله !!! وقلتيه بالإسلوب إلي كان ودي أقوله ...
لو عندي حل جان مو هذا حالي ...
الدنيا دواره حطي بالج هالشي ..
آااااااه صج آااااه من قلب
والله انا الى تعبنى بوستج
لانى حاسه بكل كلمه كتبتيها
اييه يا الماس
تلوعنا من هالناس
والى يعور انا تكتشفينهم بعد عشره وعمر بعد سوالف وضحك
دنيا
الناس مشكاهم لله
شنسوى
اول كنت اتعب واتعب قلبى واكل بنفسى والنهايه شنوو
اتعامل مع الناس بعفويه ومن انقرص اوخر وبس
هذا الدنيا
وكل واحد على طبعه
انا مشكلتى اجتماعيه بطبعى فوق ما تتخيلين
ما اقدر اعيش بعيد عن الناس
والى مثلى يتحمل الى ايله
وكل طراق بتعلوم
والمؤمن لا يلدغ من جحر مرتين
انتعلم منهم لما يحيا القلب
:))
ادرى تعب بس شنسوى
:)
البوست حسيت طالع من قلبج بعد عمرى انتى
:)
Reema
آآآآآآه يا ريومة
ابيات رائعة قريتها من كل قلبي
سمحولي انضم لحملة طاب خاطري وأكون أحد أعضاء الرابطة
آه يا ربي ليش جذيه الناس
عاد احنا حبوبين واشزيننا
بس في ناس للأسف
ما أقول إلا الله يهديهم
قلب مال آنا وقلب مال إنتي سيم سيم
اسم الله على قلبج
دانة
يا دانة العشاق
ياختج طفح الكيل من تصرفات الناس
ليه متى وأهم به
أهم جزء بالحياة في ربكة
الله يهديهم
معاج حق الدنيا دوارة
الله كريم .. ويهون الجرح الأليم
كاريزما
كروزتي الحبيبة
صاجة كنت أكتب من كل قلبي
ليش الناس ما ينفع معاهم الطيب
ليش لازم ننلدغ بالنهاية
وإذا الواحد هذا طبعه ما يقدر يتلون مثلهم شسوي بهالحالة؟
الواحد يحتار .. معاهم
آنا مثلج شكثر آكل بنفسي
وأنقهر وايد
حساسة .. بسرعة أتأثر
صاجة الواحد يتعب
آه يا كاريزما
والله انتي قلبي
ماقصرتي على هالتعليق
أخذت راحتي بالتفضفض
واضح انج اجتماعية وعلى طبيعتج
تسلمين حياتي
أفأ
لموووووووووووس
حبيبة ألبي مو جوّوووووووووه
بيعينا بالسوق يبا
كل شي و لا زعلج يالغالية
فضفضي حبيبتي فضفضي
مافي أحد مرتاااااااااح
و اذا على القلب تعالي أنا عازمتج على عصير الضاحية "قلب مال أنا عور" باااااااااارد يبرد على قليبج و لا تحترين حبيبتي انتي
:*
صيري شريرة و راح تتفهمين وجهة نظرهم
الشر مو زين بس ممكن يكون فيه لذة
purple
يا هلا وغلا
وينج مختفية عن الأنظار
حياتي على راسي إنتي من فوق
شفي يا وخيتي
الناش مذعليني
كله يذعلوني .. كله يذعلوني
ماكو صج بهالوقت شدعوة! شصاير؟
ليش .. شحقى .. اش ماله
أفضفض
انطق .. قول .. تحج (مسرحية بخور أم جاسم) كله من صلحلح
ياختج الناس مادري شفيهم .. تعاملهم صار عجب عجاب
صاجة مافي أحد مرتاح
الله يعين
والنبي عاوزة واحد جيلاتي لموناتة
وفراولة بالشاكالاطة
وإديلووووو
حلاوتك يا تيعم .. يا جيلاتي
تسلمين مشكورة حبي
مطقوق
تصدق ما أعرف أكون شريرة
ولا عمري استشريت
انت نفسك ما تقدر تصير شرير
سيماهم في وجوههم
سمات ويهك ما تعطي شعور بالشر
إذن أنت غير قادر على ان تكون شرير
يمكن انت تقصد الواحد يكون شديد
ممكن .. بس هم قلبي ما يعطيني
الشر مب زين
عشان عداد السيئات يحسب وكما تدين تدان
على قولة بنت أخوي عين الله كبيرة .. تشوف كل شي
خلها على الله أحسن
الاعتدال يعنى لازم اقيس اللى جدامى مو الكل يستاهل ريج حلو :)
مشاري
إي صح مو الكل ينعطى ريج سنع
وعشان جذيه ذكرت إن إحنا بحذر دائم بالتعامل مع الآخرين
للأسف
القيم الإجتماعية في اندثار وانقراض
مرحبا و سهلا
كلامج يدور في ذهن اي شخص يفكر في هذي الامور
ارضاء الناس غاية لا تدرك
الأستاذ بلاليط
عدل ارضاء الناس غاية لا تدرك
بس غاية تعاملهم أصبحت واضحة
تفتقد إلى الصدق والإلتزام
وأحلى شي بالتعامل المصداقية
أشكرك عالمرور الأول
شكرا
مساالسعاده
مساالرقه
لأحلى الماس
حبيبتى هذا الموضوع لو حاولنا نحله جان حلينا من زمان
الدنيا قاعده تتغير والناس قاعدين يزدادون سوء على سوء
وعلى قولتج مافى احد يفكر ان لكل شى نهايه
واولها العمر للانسان
بس شنقول
الله يرحمنا برحمته قولى آميييييين
دمت يالألماسه
:))))))))))))
Post a Comment