يا أرض لا تبجينيا أرض لا تشكين
لنا الله ،، لنا الله
إن كان ميزان الذهب غشاش
لنا الله ،، لنا الله
والمظلوم ،، آه يا حوبة المظلوم
يا أرض أوعدج
آنا أوعدج مهما يطول الجرح
والدمعة تسيل
ما أتغير
وعمر الزمن والله
مايغير أصيل
أوعدج أبقى على
باب الصبر طول العمر
وأرجع وأقول لكل
ظالم نهاية
الكل يذكر مسلسل الغرباء إلي كان ينعرض برمضان بعد باباي الفطور حسون الملعون إنياآآآآآ
كنا نتسمر جدام التلفزيون حق مسلسلات الأطفال إلي غالبا ما يكون فيها حركات وخدع سحرية
وقصص من الخيال
لكن
هالمسلسل بالذات الكل كان يتابعه
كان له جو خاص فيه
وقصة شدت الجميع .. الكبير قبل الصغير
أذكر .. عبدالرحمن العقل مشهور في لزمته
عاطوني ..دينار
في هذه الفترة كانت مسلسلات الأطفال في أوجها
ومن بعدها أتى زمن الإنحدار بالأفكار وطريقة الطرح وقصص مالها معنى
المهم موضوعنا اليوم يتكلم عن استعدادنا لروتينيات رمضانية
رمضان عالأبواب مبارك عليكم الشهر بأسبقكم
تدرون بعد .. من سبق لبق
وبمناسبة الشهر الكريم ... استعدوا للآتــــــي
بعد اسبوع من تاريخ هذا البوست .. وعدوا معاي اسبوع واحد فقط
راح تنزل العروض الرمضانية بكل الجمعيات والأسواق
تكدس المسلسلات المحلية والعربية تكدس غير طبيعي
وتعتبر هذه الحالة غير صحية .. يرجى أخذ الحيطة والحذر
سبحان الله المجتمع ما في إلا المساوئ عشان تناقشها المسلسلات .. جنه مافي خيرات .. مافي أشياء حلوة وزينة
يعني شي يطيب الخاطر مافي أبد؟؟؟؟ سؤال للمؤلفين
يا بختنا .. كل سنة نشوف نيولوكات يديدة وملابس وموضات كشاخية
ومكياجات صاروخية .. يا ربيييي حظنا نازل من السما .. ما يحتاج ندور بالكاتالوجات ولا غيره
الشي عندنا جاااااااااااااهز
أفشات الجرايد المعتادة والتعليقات المستمرة وإلي مالها طعم نشوفها يوميا بالجرايد عن المسلسلات واللوك الجديد للممثلات
تكثر برامج الطبخ وفنون النفخ بالذات برمضان .. سؤال ليش؟؟؟؟؟؟؟؟؟؟؟؟؟؟؟؟؟
يعني برمضان ناكل .. ومن غير الشهر الفضيل ما ناكل؟؟؟؟؟؟؟؟؟؟
محكومين ثاني يوم رمضان دعايات الصيداوي .. نطروا شوية
خلتهدا روسنا من الدوخة وناخذ عالوضع بعدين .. يرجى التريث
القرقيعان عادة كويتية قديمة .. وحلوة .. ليش بالدعايات نشوف جنسيات أخرى لا تمت بالصلة لهذه العادة
وهي جزء من تراثنا .. وتراث الخليج كله
يا زين البنيات بالدراريع والبخانق
والصبيان بالوزار والقحافي والجيسة
قلت أفكااااااااااااااااااار؟؟؟؟
بعد اسبوع واحد بالضبط من غرة رمضان .. تنزل الإعلانات بالجرايد
تفتيحة العيد
لحظة .. لحظة صبروا .. خلنتهنا بالشهر الفضيل
كل شيكم بسرعة ... لحظـــــــة
يا صاحبة الجلالة .. يا صحافة .. أرجو تخففين من اخبار الإجهار بالإفطار
لأنها تشهير بسلوكيات الناس .. وكل شي له حدود
الفوازير .. وما أدراك ما الفوازيز والحزازير
يبيلة ألماسااااا حظ وووناسااااااا
عاااااااااااشوا
يابختي .. ويا من حظي
قاعد يتغنون بإسمــــــــــي
وازيني زيناه
اترك فقرة الفوازير والحزازير لمن يجيد النقد البناااء ويبدع في هذه النقطة
لأنها نقطة حساسة
لكن أحلى شي بهالسنة إني بكون بإذن الله معاكم بالقريش .. قريش السنة قريش بلوغي درجة أولى
وبأقضي وياكم انشالله أكون من الحيين والعايشين أيام الشهر الكريم
وعساكم تعودونه
وكل سنة تصومونه
