لحظات رائعة

أحلى اللحظات والتي بها أشعر أنني بعالم آخر

لما طفل صغير يكون يوعان حده وأسويله الحليب بالممية وبس أقربها .. المسكين من اليوع يمسكها بشفايفه وإيده حيييييل حياتي والله

لما طفل صغير توه يمشي يخطي ويطيح إيي صوبي واشيله وأحضنه حييييييل وأدلدغه ويقعد يضحك

أول مايبدي يحبي .. أول مكان يحب يروح له ... المطبخ .. مادير شنو السر؟؟؟هذا شئ لاحظته باليهال

لما يبدي الياهل ينحط بالدراجة (الدراية إلي تعلمه عالمشي) وأول ما يبدي .. يمشي فيها ليه ورا وبأقصى سرعة ووررررررررررر

لما الياهل يبدي يقعد .. بس نص ونص .. ويطيح على جنب ... ياحلاتك والله

لما الياهل الصغير يركض بالتبان (الملابس الداخلية للطفل) يركض ويضحك وأمه تركض وراه .. يعني بينحاش من السباحة

وياحلاته ... إذا تثاوب .. شفايفه صغيرة .. ومافي أسنان .. والوجه نتفة .. إيهبل

لما نحط حق الياهل بودر جونسون بعد السباحة وينام بسريره ... الله .. الواحد بس يطالع بوجه هالطفل يحس بسلام بالكون

لما يطلع إيده من المهاد ويقعد يسولف بروحه والدتي تقول إنه الياهل بهالوقت الملائكة تضحكه وتناغيه

وسبحان الله لما يشوف الأم مجبلة عليه وإلا تمر صوبه ويميز ريحتها .. سبحان الله يستانس .. للعلم الياهل بهالسن إيشوف المسافة إلي بينه لما يكون على ذراع أمه وبين عيونها فقط .. سبحان الله والأم إهي الوحيدة إلي يميزها بالنظر والرائحة والأب يميزه بصوته .. سبحان الله

لما الياهل يتعلم يسلم بإيده ويقول بااااي وإيده الصغيرونة بإتجاه الشخص إلي بيسلم عليه وعيونه عليه والإيد تتحرك يمين ويسار يعني بااااااااااي

لما نلبس الياهل الصغير دشداشة ومكسر وعلى شرط شارينهم له من سوق الديرة ... ومعاها قحفيه من المطرزين والراس يتقلقل في رجفية .....واي ياقلبي يا حلاتهم

ويوم القرقيعان الجيسة أكبر منه .. وي سلم قلبهم والله

أحلى شي لما الياهل يسحب الكنبل (وطبعا يكون خفيف) وإيي وينام عند الجدة أوالجد .. ياحلات اليهال

ووقت النوم الياهل إلي توه يتعلم الكلام .. يبدي يقرق ويقرق .. ماندري شقول .. بس يونس .. ومسكين إلي يمه يدوخ من القرقه والسوالف والياهل ..يكون يمه الريموت يلعب فيه وفجأه يعلى صوت التلفزيون ويفز النايم

أحيانا الياهل يشرب الممية ويمه أحد والدته.. أبوه .. خالته .. أي أحد .. بعد مايشبع من الممية يمسكها بإيده ... وطاااااااخ على راس إلي يمه ... شكثر تصير فيني يوم الزوارة والكل إييب عياله .. عاد خوش صعرورة بعد كفخة طرف الممية عند أعلى الحاجب

لما اليهال يحوسون تحت الوالدة وقت الطباخ ... وطلباتهم مرة يبون بسكوت .. مرة برد .. مرة كيك .. مرة حلاو وألحين وقت الشتا يحلالهم الأفندي الفاكهة الصغيرة وبالصيف الرقي والبطيخ البارد .. لأنهم مايطولون فيطلبون من أمي

يوم الزوارة ... اليهال يسون فيني دقة ... إييبون لي هدية .. وبالآخر يطلع مقلب منهم وشوف الضحكات إلي على وجوههم ضحكات حقيقية ومن قلب

لما الياهل يكون حجمه نتيفة ويحاول يقلد الكبار عالغدا يبي يتربع .. وازينه ... ريله ماتكفي يتربع .. صغيرة وايد

لما الياهل يضحك وعنده درايش .. أسنانه إلي جدام طايحين .. شكله إيهبل

لما يلعبون اليهال بالحوش ويسون قروبات .. وإذا كان اللعب بالكرة ... تحطيم شكلهم إينن .. تسمعهم يالله ... وأبوالدرايش يقول يالله

بثرعة .. قط الكرة ... يالله إركض .. قووووووووووول ويتزحلقون بماي المطر .. وهذا يتعور وهذا يضحك مالهم شغل .. أهم شي عندهم بالحياة اللعب

عندهم لعبة عجيبة .. طبعا القواري والسيارات اللعبة متوفرة بالحوش.. يربطون كل وحدة بالثانية بحبل والسيارة الأولى يسوقها المتختخ والمربرب .. لأنه باعتقادهم هو الأقدر على سحبهم ... واسمع التعليقات ... يالله يالبطة ... دوس يالبتمة

أحلى شي ... بالشارع تلقى ياهل يردف رفيجه وإلا أخوه بالقاري .. والمسكين الياهل المردوف متقلقص بين السكان وإيد الياهل السايق والثاني من الثقل موقادر يوجه سكان القاري... مايخالف كله يهون عشان الوناسة

لما يهال صغار أثنين يتعاونون على فتح قرطاس الككاو أوالبفك وإلي يفتحه ياكل منه الأول .. مايهم ماله مو ماله... عادي

لما طفل صغير يتعلق فيني يبي حلاو .. كل يوم عندي مشوار للجمعية عشان حلاوهم وطلباتهم .. فداهم .. حياتي وايد أحبهم

أحلى شئ بالدنيا الأطفال أحبهم حب جم ... لكني ضعيفة جدا أمام دمعة وحدة تسقط من عيونهم