احتفالات رشاشية

اليوم الصبح مريت عالمكتبة بشتري بعض الشغلات وشفت جدامها سيارة والعمال قاعد ينزلون كراتين طبعا كراتين شهر فبراير كراتين الفوم .. وهذا استعداد للإحتفالات الوطنية الياية .. وللأسف الشديد صارت مظاهر الإحتفال بهذه المناسبة بالرقص بوسط الشارع والأصوات العالية والهز بالسيارات وأكيد ملح هذا المنظر الفوم والترشش عالناس الشباب يرشون عالبنات والبنات يرشون عالشباب والتعليقات والكلام والضحك بصوت أعلى من العالي .. ويسببون زحمة موطبيعية لنفرض في أحد عنده حالة طارئة أو شغلة ضرورية واضطر يمشي بهالشارع وتصادفه زحمة شبيسوي!!!... شحقى هالتصرفات ... بسأل ليش هذا كله هل أهو الفراغ! وإلا فضفضة الخلق بأي شي! وإلا متعة ووناسة شالعبرة من هالتصرفات ..و المشكلة إنها ماتعدي على خير إلي يختنق بالسيارة من الفوم ..وإلإ تصير هوشة وعجرات وسجاجين ودرنفيسات وتلقى ضبة وغبار والكلام الخارج عن الذوق ... يعني حالة لا توصف .. لييييييييييييش

والله حرام طاقات الشباب تروح على هالتفاهات والشغلات إلي مالها معنى .. آنا أحيانا ما أحط اللوم كله عليهم .. بالعكس ساعات يكسرون خاطري أشوف مناظرهم بالمجمعات بموضة الشعر الواقف شعره يعد (خشن) وإلا ناعم .. عادي عندهم المهم الشعر شاخص وواقف يالله كله محصل بعضه وإلا الموديل إلي يقهرني إللو ويست مو حلو سوري على هالكلمة يلوع الجبد .. يذكرني بأيام قبل لما اليهال يلعبون بالسكة ومن كثرة اللعب والتعب مايدرون عن نفسهم فالبنطرون ينزل عند عظمة الحوض .. الموضة سواء تلوق عليهم أو ما تلوق يسونها .. أصبح عادي جدا .. بس هم يكسرون خاطري (طبعا مو الكل).. بس أحسهم من داخل فاضين مافي قيمة داخلية فيبون يسون أي شي في أي وقت في أي مكان ... موضة السلاسل من متى والريال عندنا يلبس سلسلة!!!! شحقى ؟ وإلا الفنايل إلي عليها صور وتعليقات فاضحة أمبيه وين الدين وين المبادئ .. مومعقول كل هذا يروح أمام الموضات والصرعات .. عشان جذيه آنا أقول الشباب ما عندهم قيمة لشئ بداخلهم .. ولا ننسى الإعلام والدعايات وبرمجة أفكار الشباب على أمور تافهة ومالها فائدة أولية بحياتهم ..و يشارك بهالشي التجار إلا ما همهم إلا الكسب وبس وكله على حساب هالشباب المساكين ... أرجع لنقطة البداية .. اتمنى نتحتفل بالعيد الوطيني مثل أيام قبل أيام .. المسيرات المنظمة إلي تشارك فيها كل المدارس وترفع الصور الوطنية والأعلام .. بدال ما تنلف الأعلام على الوجوه وتمتلئ بألوان الروج من وجوه البنات (قلبي يعورني) ما أحب اشوف هالمنظر

بمسيرات قبل كنا نستانس .. تلقى الزهرات والكشافة باليونيفورم والشرايط ويمشون بانتظام والفرق الموسيقية ذات الإيقاع الوطني يمشون وراهم ... والأمهات يباب و ينثرون ورد وملح عليهم .. منظر حلو وجميل

أتمنى من الأخ العزيز مطقوق بما إنه صاحب قلم جرئ وحاذق يتناول موضوع مظاهر الإحتفالات الوطنية بهالوقت

وبالنهاية أتمنى الشباب والشابات مايقومون بمثل هذي الشغلات (أصلا يسيئون لنفسهم لأنه كل شخص يعبر عن نفسه ... بس المشكلة بالإنتماء .. مانبي أحد من برة يستغرب ويعلق على مظاهر احتفالنا بالمناسبات الوطنية) ..ونلقى حل جذري للشباب.. لأن المشكلة مو فيهم المشكلة بوقتهم وضرورة توجيه مسار أفكارهم واهتماماتهم .. بمشاريع .. بشغل .. بتطوع .. بأي شي يفيدهم ونحسسهم إن في قيمة داخل نفوسهم لشي يسعون له ويبون يوصلون له .. وأهو هدفهم بالحياة .. بدال ما ننطرهم يكبرون ويضحكون على نفسهم ويتحسفون على الوقت إلي ضاع هدر

وطني في كل الأعياد وبكل المناسبات وفي كل يوم وفي كل لحظة .... إنت حبيبي ... يا أغلى وأعز ما عندي