هذا الإسبوع كان دوري بإلقاء محاضرة بالكامل بلغة الإشارة الكل عارفها إلي إهي لغة الصم والبكم .. وبأمر من الدكتور إلي يدرسنا وعشان يكون في نوع من الفكاهة والتغيير لازم كل شخص يختم بموقف طريف صار له ونمثله بلغة الإشارة .. طبعا آنا ما أنسى هالموقف بحياتيجاهزين .. معاي .. استعدوا
كان عندي مقابلة شخصية للعمل في احدى البنوك إلي بالديرة وقت الظهر قبل نهاية دوامهم .. وطبعا آنا مجهزة أوراقي وعفستي وللعلم هذا ثاني موعد أرتبه معاهم لأني اعتذرت للمرة الأولى لسبب انشغالي .. طلعت من البيت متزقرته والمعنويات عالية وعلى خط البحرأسمع المارينا أف أم .. وصلت المواقف .. نزلت وأخذت أغراضي وماشية بأمان الله .. قبل بوابة البنك فيه رصيف عالي شوي وآنا في وضع الصعود تنعكف ريلي وتتعرجب .. بس الحمدلله مو طيحة (ويهي صار مثل وجه البنوتة إلي بالصورة فوق) .. لكن شنو!! .. عقب دقيقتين استوعبت إنه (حشاكم) كعب فردة الحذاء انفصل انفصال تام .. أهو بصوب وآنا بصوب .. أضحك على شنو عالطيحة .. وإلا عالموقف .. وإلا الحالة .. وآنا بطبعي كريكرة .. ماقدرت أمسك نفسي وقمت أضحك بهدوء .. الحمدلله إنه سيارتي يمي فرجعت .. وبدا عاد إهني الجد .. شسوي ؟ شسوي! الموعد .. أمبيه فشلة أتأخر عالناس .. أمبيه احراج ييت أتصل عشان أعتذر .. الصدمة الكبرى .. رصيدي 25 فلس يادوب أسمع الآنسر ماشين وينقطع موعوايدي أخليه بهالتصفيرة لكن مقدر.. إنزين هالحل مانفع .. فكرت فكرت .. شفت السوق وراي .. أروح أشتري (حشاكم) حذاء يديد .. شلون أمشي!! لازم أتصرف قلت أكسر الكعب الثاني ويصيرون نفس الشي بس الحجي مو إهني .. الحجي حجي السوق إلي مسكر مافي أحد عزلوا (عزل السوق) أمبيه .. مومعقول كل هذا بيوم واحد .. لألألأ والوقت محسوب علي .. فكرت .. دزيت حق صديقة عمري مسج واحد فقط نظرا للرصيد المقلب.. بما ان سكنها قريب من المنطقة قلتلها السالفة باختصار شديد وطلبت منها تشتريلي واحد يديد وآنا بالمكان الفلاني ضروري .. وأنطر .. وأنطر..ألحين ترد .. ألحين ترد .. مافي ... خامووووووش .. ومر الوقت واستسلمت للأمر الواقع وتدق علي صديقتي .. ببرادة قلب تضحك .. وآنا ساكتة .. حسبالها أتقشمر معاها من كثر ما أطفرها وأعمل عمايل ف حسبالها مقلب ..صبرت ليما سكتت ..و آنا طبعا مقتنعة إنه المقابلة راحت علي .. بس أبي أطلع حرتي .. قلتلها.. ساعة وآنا أنطرج إنتي وينج؟ ردت: من صجج .. وآنا اشدراني! .. حسبالي مقلب من مقالبج .. المسكينة بتراضيني مهي عارفة .. فقلتلها اتيبيلي ألحين .. عالأقل أعتذر من الناس .. جان تروح المسكينة أقرب سوق واتييبلي واحد يديد
ودخلت البنك والموظفين قاعد يسكرون كمبيوتراتهم والسكرتيرة تقولي تأخرتي يا ألماس .. استأذنتها للدخول للمدير إلي المفروض المقابلة معاه .. وقلت له .. آنا حيل أعتذر .. مرتين الزمتكم بوقت وما التزمت فيه لظروف خارجة عن ارادتي .. آنا أعتذر
المدير قدر الوضع .. وعقبها بفترة اتصلوا فيني مرة ثانية لتحديد موعد آخر ..ولأني منحرجة منهم وعالموقف إلي صار تعتذرت لهم بعذر مهذب ... وانسحبت بهدوء
وكاااااااااااااااان يوم لا ينسى
3 comments:
هممم الحكمة من هالسالفة ان الواحد يحطله خط فواتير مو ايزي
طيب اشلون قلتي ماعندي رصيد
بلغة الاشارة
صباح الخير
مطقوق
عزيزي مافي فايدة .. ماينفع .. لافواتير ولا إيزي .. حولت عالإيزي عشان أسيطر عالمكالمات .. بس للأسف نو يوز
براك
أول شي اشارة الموبايل كأنك قاعد تتصل وبعدين تضغط بصبع الإبهام بوسط اليد اليسار وعقبها اشارة الفلوس .. أشارتنا العادية وآخر شي اشارة الصفر
على فكرة تركيبة جمل الصم غير عن تركيبة جمل المتكلمين .. لكنها ممتعة
أشكركم
Post a Comment