جنون أفكاري الجامح

طبعا الكل عارف إنه باجر الفالنتاين .. إلي مستعد وإلي كاشت .. وإلي طاف .. كل على حسب وجهة نظره بالموضوع

رأيي الخاص .. ما نحتفل فيه كمناسبة قوية .. بس ننتهزها فرصة لترطيب القلوب العطشانة لمشاعر الحب والألفة .. وإهني أقصد أهمية هالمناسبة بالنسبة للزوجين .. أعتبرها مناسبة حلوة لهم .. بليييز ثم بلييييز لاأحد يقول مايصير وحرام .. وحلال .. أمانة لما واحد إييب حق الثاني هدية بغض النظر عن الحب وإلا غيره ... مو يستانس!! أكيد بيستانس .. ف يكفيننا شعارات .. وخنعيش الحياة

ومن هذا المنطلق حبيت أعيش في خيالي مع جنون أفكاري لزوجين يحتفلون بهاليوم على افتراض شخصيات من الخيال

الزوج اسمه محب والزوجة إسمها إيلاف

محب يدش البيت في يوم الفالنتاين بالدشداشة الحمرا وبعد الغترة الحمرا ومسباح عقيق أحمر أصلي ماسك ورد أحمر خاشه عن الزوجة ورا ظهره بينما الزوجة قاعدة بالصالة بالدراعة الحمرا وعلى شرط تكون من أفخم محلات الدراريع بالكويت .. والبخور والسنع .. المهم دار هالحوار

محب: قوة حبيبتي

إيلاف: هلا بعمري هلا .. يعطيك العافية.. يه يه يه شهالزين .. يالله حياتي خل أجهز العشا

وطبعا مجهزة طاولة الطعام .. كل شي على قلب الحب الأحمر الصحون والسجاجين حمر والقلاصات أحمر شفاف والملاعق والكلينيكس وكل شي على قلب الحب الأحمر ولا ننسى الأضواء الخافتة والجو الشاعري .. يعني هاليوم تحطيم

إيلاف : يالله حياتي العشا جاهز

محب: ماشالله .. ماشالله .. كل هذا عشاني .. يا أغلى وأحلى زوجة بالدنيا

إيلاف: أكيد عشانك يا روحي ماعندي أغلى منك ...(الزوج بيمد إيده) عنك عنك ..اليوم راحة .. آنا أوكلك

محب مستغرب جنه .. فيه مبالغة .. لأنه ما تعود على الزوجة تكون بهالرومانسية العالية

محب: قبل ما آكل أول لقمة من إيد زوجتي العزيزة .. تفضلي يا الغالية

إيلاف: الله يا حلاته (تشم الورد) حياتي هذا عشاني

الزوج يهز راسه بالإيجاب

إيلاف: وأحمر بعد .. حركااااات

محب: عجبج حبيبتي

إيلاف: أكيد يا روحي بيعجبني .. بس إلي بيعجبني أكثر الهدية إلي داخل الورد

قالها: غمضي عينج ودوري بين الورد

غمضت إيلاف عيونها وقامت تدور بين الورد وتلقى الورقة وتفتحها وتقرا كلمة بالخط العريض والكبير.. أحبج

إيلاف بدلع: أووووه يالله عاد يوز عن هالسوالف .. وين خاش الهدية

محب: الورد للورد

إيلاف بدلعها: يالله عاد قول

محب: عذب الكلام

إيلاف:شاريلي سيارة وناطر نخلص العشا وأنزل أشوفها

محب: بالسوق طربة زيادة الرواتب

إيلاف: وإلا حاط مفتاح البيت اليديد بعلبة حمرا وبنلعب بارد حار

محب: محال اسقاط القروض

إيلاف: إييييييه عرفت باجر بتاخذني نأثث البيت من يد ويديد

محب: كوبونات هلا فبراير

إيلاف: عيل أكيد مرتب لي سفرة سنعة على ذوقك..حياتي

محب:الزجيرة تنفع .. عروض عشرة على عشرة

إيلاف: بدلة سوارييه من لبنان أعرفك ذويق بهالسوالف

محب: خنت حيلي الفيزا والماستر تسحكوا

إيلاف: خلاص خلاص عرفت .. أكيد حبيب روحي آنا .. يايبلي

محب قاطعها: ألوفة حبيبتي .. كلمة أحبج مو كافية؟؟

إيلاف متفاجأة: .. صارلي ساعة أتسنع وأتبخر وحالتي حالة .. عشان بالآخر هذي هديتي .. ورقة ومكتوب فيها كلمة

يه وقت الجد

محب: يعني لازم تكون الهدية غالية وإلا مايصير .. إنتي تقيسين حبي لج بقيمة الهدية .. إذا كان هذا تفكيرج .. فآنا أقولج كل هدايا العالم أقدمها لج بهالكلمة .. وفسريها مثل ما تحبين .. عن إذنج

الريال متذكرج بهاليوم ومتجهز.. وساكب بالدشداشة الحمرا .. وبالآخر ترفضين طريقة تعبيره عن حبه لج.. علامات تعجب

برأيي الكلمة الحلوة والصادقة إلي تطلع من القلب إهي أحلى هدية ..وخصوصا إذا كانت بين الزوجين يكون لها طعم خاص